Բռնաբարելու փորձի համար մեղադրվող գյումրեցի Հրաչը ազատ է արձակվել

Այսօր Շիրակի մարզի ընդհանուր իրավասության դատարանը փոխել է ռուս զինծառայողի կնոջ բռնաբարության փորձի համար կասկածվող գյումրեցի 28-ամյա երիտասարդի խափանման միջոցը։ Նա ազատ է արձակվել 500 հազար դրամ գրավի դիմաց։ Այս մասին նրա փաստաբանը՝ Էդգար Թումասյանը տեղեկացրել է «Առավոտին»։

Փաստաբանը նշել է, որ սրանով չի բավարարվելու, քանի որ գրավը կիրառվում է միայն այն դեպքում, երբ առկա են կալանքի հիմքերը։ Թումասյանը պնդել է, որ տվյալ գործով ինչպես կալանքի, այնպես էլ որևէ այլ խափանման միջոցի հիմքեր չկան։ Ըստ փաստաբանի, իր պաշտպանյալը պատրաստ է մազի, արյան, եղունգների հագուստի նմուշներ, մատնահետքեր տալ, որով կապացուցվի, որ ինքը որևէ կապ չունի ռուս կնոջ՝ ոստիկանության ներկայացրած հաղորդման բովանդակության հետ։

Հիշեցնենք, Ռուսաստանի 20-ամյա քաղաքացի Ե. Դ.-ն բողոք է ներկայացրել, ըստ որի՝ Հրաչ Շահնազարյանը եկել է իր տուն և դանակի սպառնալիքներով փորձել է բռնաբարել իրեն։