Ամուլսարի հարցում կա ընտրովի մոտեցում, հանքարդյունաբերության մեջ՝ երկակի ստանդարտներ

Փոխվարչապետի գրասենյակի ղեկավար Վարագ Սիսեռեանը խոսել է Ալավերդու պղնձաձուլարանի մասին, բայց նրա խոսքն ավելի շատ վերեբերել է Ամուլսարի հանքին:

Նա Ամուլսարի հանքի մասին բառ չի ասել տվյալ նյութի շրջանակներում, բայց մի շարք հարցեր է առաջացրել Ամուլսարի հանքի մասով: Հարցերը հետևյալն են՝

1. Այդ ինչպե՞ս է պատահում, որ Ալավերդու պղնձաձուլարանի 650 աշխատակիցների ճակատագիրը հետաքրքրում է կառավարությանը և շատ արագ լուծում է գտնվում գործարանն աշխատացնելու համար, բայց Ամուլսարի հանքի աշխատանքներում ներգրավված 1000-ից ավել աշխատողների ճակատագիրը արդեն ավելի քան 120 օր է չի հետաքրքրում կառավարությանը և օպերատիվ լուծումներ չեն գտնվում: Եվ դա այն դեպքում, երբ Ալավերդու գործարանի աշխատանքի արդյունքում խախտվում են նորմատիվները և վնասվում է շրջակա միջավայրը, իսկ ահա Ամուլսարի հանքի վնասակարության մասին բացի անհիմն հայտարարություններից այլ ապացույցներ չկան:

2. Այդ ինչպե՞ս է պատահում, որ կառավարությունն ընդառաջ է գնում Ալավերդու գործարանի ղեկավարությանը, բայց ոչ մի կերպ չի ուզում օժանդակել «Լիդիան Արմենիային», որի աշխատանքները խոչընդոտվում են ապօրինաբար:

3. Այդ ինչպե՞ս է պատահում, որ Ալավերդին աղտոտվում է, բայց ցերեկը մոմի լույսով անգամ ցուցարար-բնապահպան չես կարողանում գտնել այնտեղ, իսկ ահա Ամուլսարի ճանապարհի վրա ցուցարարները վխտում են անգամ այն դեպքում, երբ հանքը ամիսներով չի աշխատում: Ո՞վ և ի՞նչ նպատակով է ֆինանսավորում «բնապահպաններին»: Արդյո՞ք սա տնտեսական դիվերսիա չէ:

4. Մի՞թե կառավարությանը թվում է, թե Ամուլսարի ներդրողները այդքան հիմար են, որ չեն տեսնում հանքի նկատմամբ ընտրովի վերաբերմունքը և հանքարդյունաբերության ոլորտում կիրառվող երկակի ստանդարտները:

Սրանք հարցեր են, որոնց պատասխանները շատ կոնկրետ պետք է լինեն:

Արմեն Միքայելյանի ֆեյսբուքյան էջից