Լույս է տեսել Հրաչյա Սարուխանի «Վախճանից էլ պարզ» ժողովածուն

Աղվան Վարդանյանի և Արքմենիկ Նիկողոսյանի խմբագրությամբ «Անտարես» հրատարակչությունը լույս է ընծայել մեր ժամանակների լավագույն բանաստեղծներից մեկի՝ Հրաչյա Սարուխանի (1947-2016) «Վախճանից էլ պարզ» ժողովածուն: Այն, կարելի է ասել, բանաստեղծի գրական ժառանգության ամփոփումն է. ներառում է բանաստեղծի հրատարակած բոլոր ժողովածուները, ինչպես նաև գրքերից դուրս մնացած բանաստեղծություններ, անտիպ գործեր, թարգմանություններ: Իբրև ամբողջություն «Վախճանից էլ պարզ» ժողովածուն երևակում է Հրաչյա Սարուխանի ինքնատիպ ու անշփոթելի բանաստեղծական ոճն իր սքանչելի հմայքով ու տարերքով:

ՀԱՆԳԵՐԳՈՒԹՅՈՒՆ
Հրաչյա Թամրազյանին

Մենք՝ տարահայր որդիներս կիսախորթ,
Որ նայում ենք դեպի Լյառն Արարատ,
Ժառանգելով մեր անցյալը ծիսահորդ –
Անծիսություն սերմանեցինք ճարահատ…

Բայց մեր որդիք՝ մեր զավակներն անպատեհ,
Մեզնից հետո մեզ կներեն հայրաբար,
Որ մեր հոգու հիշատակները չատե՛ն
Մեր թագավոր աճյունների հո՜ւշը վառ։

Մենք՝ տարահայր որդիներս կիսախորթ,
Բախտի նման շռայլ եղանք ու շվար…

ՀՈՒՇԱՍՅՈՒՆ

Ես Հուշասյուն կանգնեցրի այբբենակերտ –
Բեկորներով բիբլիական բնաքարի.
Կոթողն ի վեր՝ թևատարած մի թռչնակերպ –
Երկնախորհուրդ բյուրեղներից իմ քանքարի.

Սաղմոսելով խոյանքի մեջ խաղաղ ու խոր,
Աչքը հառած Հորացիոսին իր մտերիմ՝
Խա՛ղ է խաղում խալխի գլխին խառնաժխոր՝
Ի տրիտուր ներդաշնությանն ու գյուտերին։

Ես Հուշասյուն կանգնեցրի… Ներհակավոր
Հյուլեի պես հավատարիմ յուր նյութերին՝
Ապրա՜ծ կենա Քերթությունը մեր թագավոր,–
Թոթափվում են թրքաթաթար թյուրն ու թերին…

ԻՆՔՆԱԿԱՄ ԱՔՍՈՐ

Հեռու՝ կրքերից ներազգայնական,
Հասարակական-քաղաքական հույժ,
Մտավոր սիրով և զգայական
Ի՛նքս եմ ընտրել աքսորն իմ անույշ…

Եվ վանաձորյան անկյունում իմ այս՝
Կրքերից հեռու, գրքերին մոտիկ,
Ա՛յլ արժեք ունի և ուրի՛շ իմաստ
Խորհուրդն իրիկվա ու առավոտի,

Զի անցյալն այստեղ ինձ չի մոռանում՝
Բաժին է հանում իր ցող ու ձյունից,
Որ ամեն գիշեր Անուն առ Անուն
Պսակներ հյուսեմ հիշողությունից։

Zham.am