ԼՂ շփման գծում իրավիճակը քիչ թե շատ կայունացել է. Իգոր Պոպով

ԵԱՀԿ Մինսկի խմբի ռուս համանախագահ Իգոր Պոպովը հայտարարել է, որ Լեռնային Ղարաբաղի շփման գծում, ինչպես նաև հայ-ադրբեջանական սահմանին տիրող իրավիճակը քիչ, թե շատ կայունացել է: Հաղորդում է ՌԻԱ Նովոստի-ն:

«Այսօր ավարտվում է մեր այցը, որի շրջանակում եղել ենք Երևանում, Լեռնային Ղարաբաղում, իսկ հիմա գտնվում ենք Բաքվում: Հանդիպումներ ենք ունեցել ՀՀ վարչապետի պաշտոնակատարի, Ադրբեջանի նախագահի, երկու երկրների պաշտպանության նախարարների հետ, ինչպես նաև շուտով հանդիպելու ենք Ադրբեջանի արտգործանախարարի հետ: Ուշադրության կենտրում ղարաբաղյան գործընթացի հետ կապված հարցերն են: Մասնավորապես՝ քննարկել ենք երկու պետությունների ղեկավարների՝ Դուշանբեում կայացած զրույցները, դրա շրջանակում ձեռքբերված պայմանավորվածություններն ու ներկայում դրանց իրականացումը: Նկատի ունեմ շփման գծում, սահմանին տիրող իրավիճակը, որը քիչ, թե շատ կայունացել է: Խոսել ենք նաև Երևանի ու Բաքվի միջև հաստատված կապի գծի մասին»,- լրագրողներին հայտնել է Պոպովը:

Ավելի վաղ Հայաստանի վարչապետ Նիկոլ Փաշինյանը հայտարարել էր, որ Դուշանբեում անցկացված գագաթնաժողովի ընթացքում Ադրբեջանի նախագահ Իլհամ Ալիևի հետ պայմանավորվածություն է ձեռք բերել՝ «օպերատիվ կապ և հաղորդակցություն» ստեղծելու վերաբերյալ։ Բաքվում հավելել են, որ երկու նախագահները պարտավորվածություն են հայտնել ղարաբաղաադրբեջանական խնդրի լուծման հարցում։ ԵԱՀԿ Մինսկի խմբի համանախագահն այցի ընթացքում հասցրել է լինել Հայաստանում, Լեռնային Ղարաբաղում ու Բաքվում։