Ինչու՞ Փաշինյանը չպայքարեց նոր ԸՕ-ի համար և ովքեր ներկայացված կլինեն ապագա ԱԺ-ում. Տեսանյութ
Եվ այսպես, այսօր արդեն հստակ դարձավ, որ գալիք ընտրությունները կանցկացվեն հին օրենսգքով: Վերջին երրորդ փորձը՝ նոր օրենսգիրք ընդունել ԱԺ-ում, այլևս չի լինի, այս մասին հաղորդեց Նաիրա Զոհրաբյանը՝ այն հիմնավորելով ժամանակի նպատակահարմարությամբ: Ու թեև ոմանք արտախորհրդարանական ուժերից առաջարկում են փողոցային պահքար սկսել, պարզ է, որ գնացքն արդեն գնացել է, և նոր ուժերի շանսերը՝ մտնել ապագա ԱԺ, գրեթե զրոյական են:
Թե ինչու այսպես զարգացան գործնթացները, մենք ներկայացրել էինք մեր նախորդ հոդվածներից մեկում:
Կրկին հիշեցնենք, որ նման զարգացման սցենարը պայմանավորված էր այն հանգամանքով, որ ռեյտինգային ընտրական համակարգը այս փուլում շահավետ էր, ոչ միայն ՀՀԿ-ին, ինչպես ներկայացնում են շատերը, այլև ԲՀԿ-ին ու Փաշինյանի թիմին: Առանց ռեյտինգային համակարգի ԲՀԿ-ի վիճակը ծանր էր լինելու, սակայն հանրության առջև անհրաժեշտ էր դա ցույց չտալ և մեղքը բարդել ՀՀԿ-ի վրա, ինչը և կատարվեց:
Ինչ վերաբերվում է Փաշինյանին, ապա նրան ռեյտինգային համակարգը շահավետ էր մի շարք պատճառներով:
Պատճառ առաջին
Ռեյտինգային համակարգը առաջին հերթին շահավետ է ցանկացած իշխող ուժին, և քանի, որ այսօր այդ ուժը «Իմ քայլը» դաշինքն է, ուրեմն այս համակարգը շահավետ է Փաշինյանին
Պատճառ երկրորդ
Փաշինյանին շահավետ է, որ ապագա ԱԺ-ում իրենից բացի ներկայացված լինեն ՀՀԿ-ն և ԲՀԿ-ն: Վերջինս արդեն նրա կցորդն է դարձել, իսկ ինչ վերաբերվում է ՀՀԿ-ին, ապա այս ուժի ռեաբիլիտացիայի համար երկար ժամանակ կպահանջվի և ուրեմն լուրջ վտանգ չի ներկայացնի Փաշինյանի համար: Իսկ մյուս ուժերը ժամանակի ընթացքում կարող են գլխացավանք դառնան Փաշինյանի համար:
Պատճառ երրորդ
Ռեյտինգային համակարգի դեպքում հնարավոր է, որ «Սասնա Ծռերը» նույնիսկ չկարողանան անցնել 5 տոկոսանոց շեմը, մինչդեռ նոր օրենսգրքի պարագայում, այդ ուժի մուտքը Աժ գրեթե երաշխավորված էր: Իսկ այդ պարագայում Փաշինյանը կարող էր ունենալ ոչ միայն ներքին վտանգավոր պոտենցիալ մրցակից, այլ նաև կարող էր ունենալ պրոբլեմներ նաև արտերկրում և մասնավորապես Մոսկվայի հետ փոխհարաբերություններում: Իսկ լրացուցիչ նոր խնդիր Մոսկվայի հետ Փաշինյանը չի ուզում ունենալ:
Այնպես որ, գալիք ընտրությունների արդյունքում սպասվում է երկրի քաղաքական դաշտի նոր ձևավորում, որը անսպասելի է լինելու շատերի համար:
Արտակ Հակոբյան
Հետևեք մեզ Facebook-ում