«Լեռնային Ղարաբաղի հարցը լուծված, ավարտված է. ևս երկու սերունդ և ամեն ինչ նորմալ կլինի». Գառնիկ Իսագուլյան

Zham.am-ի զրուցակիցն է ՀՀ-ում Արցախի Հանրապետության մշտական ներկայացուցչության խորհրդատու Գառնիկ Իսագուլյանը:

-Պարո՛ն Իսագուլյան, ինչպիսի՞ն պետք է լինի Հայաստանի պատասխանը, ԱՄՆ նախագահի ազգային անվտանգության հարցերով խորհրդական Ջոն Բոլտոնի այն հայտարարությանը, որ Հայաստանն իր միջազգային հարաբերություններում հրաժարվի «պատմական կաղապարներից»՝ առանձնապես չթաքցնելով, որ խոսքը վերաբերում է Ռուսաստանի հետ ավանդական բարեկամությանը։

- Ինչու՞ միայն Ռուսաստանին նաև Իրանի Իսլամական հանրապետությանը, մենք թե՛ հյուսիսի և թե՛ հարավի հարևանների հետ ունենք շատ լավ հարաբերություններ: Բոլտոնը Հայաստանին հստակ ցուցում տվեց, որ դու պետք է այս երկուսի հետ հարաբերությունները վատացնես ի հաշիվ ԱՄՆ-ի, Վրաստանի, Թուրքիայի ու Ադրբեջանի՝ առանց որևէ հեռանկարի: Նա շատ հստակ հասկացրեց՝ պատմություն, ցեղասպանություն մոռացեք: Առաջին անգամ է ԱՄՆ-ի կողմից հնչում էդ տեսակետը, թե մոռացեք ցեղասպանության մասին:
Մենք պետք է շատ հստակ դիրքորոշում ունենանք այս հարցերի վերաբերյալ: Պարոն Փաշինյանն էլ է ասում, որ մենք երբեք Իրանի հետ մեր հարաբերությունները երրորդ պետությունների հաշվին չենք կառուցելու, թող իրենց խոսքի տերը լինեն:

-Ըստ Ձեզ, ինչու՞ են Ջոն Բոլտոնը և Ռիչարդ Միլսը փոխզիջումներ պահանջում Հայաստանից, իսկ Ադրբեջանից՝ ոչ:

-Որովհետև մեր մոտ հեղափոխություն է եղել, իսկ այնտեղ չի եղել: Նրանք հիմա դնում են ինչ-որ նշաձող: Նախկին իշխանություններին էդ նշաձողը դնելը անիմաստ էր, քանի որ դրել էին՝ չէր ստացվել, հիմա նոր իշխանությունների համար դնում են այդ նշաձողը և ուզում են տեսնել, թե դա ոնց է աշխատելու:

- Պարո՛ն Իսագուլյան, ի՞նչ դիրքորոշում պետք է ունենա Հայաստանը ԼՂՀ հարցի լուծման վերաբերյալ:

-Լեռնային Ղարաբաղի հարցը լուծված, ավարտված է: Պետք է պահպանել ստատուս քվոն: Եվս երկու սերունդ և ամեն ինչ նորմալ կլինի:

 Zham.am