Ն. Վանեսյանը համախոհների հետ փորձում է մանիպուլյացիա անել, իբր աշխատակիցները պահանջում են, որ շարունակի տնօրեն մնալ. հոգեբուժարանի աշխատակից

ՀՀ առողջապահության նախարարության «Հոգեկան առողջության պահպանման ազգային կենտրոն» ՓԲԸ-ի առողջարարանային բաժանմունքի վարիչ Գագիկ Թադևոսյանը (լուսանկարում՝ ձախից) Tert.am-ի հետ զրույցում նշեց, որ կենտրոնի տնօրենը այսօր ժամը 10-ին ժողով է հրավիրել, և համացանցում էլ հայտնել է այդ մասին:

«Ժողովին ինքը հայտարարեց, որ չի ցանկանում աշխատել, դիմում է գրելու: Իրեն առաջարկեցին, որ ի օգուտ իրեն պաշտպանություն անեն, որ մնա աշխատի, իսկ ինքն ասաց, որ այդ հարցերը առանց իրեն քննարկեն և դուրս եկավ»,-պատմեց նա և նշեց, որ Վանեսյանի դուրս գալուց հետո փոխտնօրենը և որոշ աշխատակիցները այդ հարցը բարձրացրեցին:

Նա նշեց, որ թեև արտաքուստ թվում է, որ Վանեսյանը դա չի հրահրել, սակայն, ըստ նրա, պայմանավորվածություններ են եղել, առավելևս կիրակի օրն էին ժողով հրավիրել, բայց չի ստացվել հավաքվել:

Ըստ Գագիկ Թադևոսյանի` Նարեկ Վանեսյանը իր մի քանի համախոհներով փորձում է մանիպուլյացիա անել կոլեկտիվի հետ, իբր հոգեբուժական կենտրոնի աշխատակիցները պահանջում են, որ ինքը շարունակի մնալ տնօրեն և կազմակերպվում է ստորագրահավաք, իսկ ով համաձայն չի, ճանաչվում է հակահեղափոխական։ «Մարդիկ իրենց դառը փորձից ելնելով, վախենալով աշխատանքից ազատվել, ստիպված տեղի են տալիս նրա համախոհների ճնշումներին»,-ասաց նա:

Ինչ վերաբերում է աշխատակիցների տրամադրվածություններին, ապա Գագիկ Թադևոսյանն ասաց, որ նրանք բազմակարծիք են, մի մասը նույնիսկ իր կամքը չի արտահայտել` զգուշավորությունից ելնելով: «Եթե կոլեկտիվի 51 տոկոսը գրի, որ համաձայն չէ, կարող է բան փոխվել:

Գուցե այդքան ստորագրություն հավաքվի, քանի որ մարդիկ չեն ուզում իրենց վնաս հասցնեն, տարբեր նկատառումներ կան, զգուշավորություններ կան: Հիմա ցուցակ են գրել, բոլորի անունները կան, և ով չի ստորագրում իր տեղը բաց է մնում, այսինքն հայտնի է լինելու, թե ով է ստորագրել, ով` ոչ»,-ասաց նա:

Դիտարկմանը, թե նախկինում էլ ահազանգեր եղել են աշխատակիցնեևի կողմից, որ Նարեկ Վանեսյանը անմարդկային վերաբերմունք է ցուցաբերում աշխատակիցների նկատմամբ, Գագիկ Թադևոսյանը նշեց, որ ամբողջ կոլեկտիվը ցանկանում էր հրաժարվել իրենից, երբ նոր էր եկել:

«Ինքը գիշերը խնամակալին ժամը չորսին հանել է, հարձակվել է աշխատողի վրա, կռիվ է արել պահակի հետ: Այսինքն միջանձնային հարաբերություններում պրոբլեմներ ունի: Ես անձամբ կածում եմ, որ ինքը չի կարող աշխատել և շատ հեռու է հոգեբուժական բնագավառից ոչ միայն գիտելիքների առումով, նաև միջանձնային հարաբերություններ ստեղծելու իր կարողությամբ: Կարծում եմ սխալ ընտրություն էր իր նշանակումը և ճիշտ կլինի, որ ինքը հրաժարական տա»-ասաց նա և նշեց, որ կարծում է, թե Վանեսյանը կտա հրաժարական և սա ընդամենը վերջին շանսն է:

Հիշեցնենք, որ «Հոգեկան առողջության պահպանման կենտրոնի» տնօրեն Նարեկ Վանեսյանը Բժշկական համալսարանում կայացած միջոցառման ընթացքում անընդհատ ռեպլիկներ է հնչեցրել՝ հրահրելով կոնֆլիկտային իրավիճակ:

Հայտնել էինք նաև, որ Երևանի պետական բժշկական համալսարանի մի խումբ պրոֆեսորներ, դոցենտներ, անվանի բժիշկներ և ուսանողներ բաց նամակով դիմել էին ՀՀ վարչապետի պաշտոնակատար Նիկոլ Փաշինյանին, կրթության և գիտության նախարարի պաշտոնակատար Արայիկ Հարությունյանին, առողջապահության նախարարի պաշտոնակատար Արսեն Թորոսյանին՝ խնդրելով համարժեք գնահատական տալ Մ. Հերացու անվան պետական բժշկական համալսարանում տեղի ունեցած միջոցառման ժամանակ «Հոգեկան առողջության պահպանման ազգային կենտրոն» ՓԲԸ-ի տնօրեն Նարեկ Վանեսյանի պահվածքի մասին:

Նարեկ Վանեսյանը ֆեյսբուքյան իր էջում գրառում է արել, որտեղ հայտնում է, որ այսօր աշխատանքից ազատման դիմում է ներկայացնելու առողջապահության նախարարին: