Մարիա Զախարովամ Նալբանդյան-Լավրով առաջիկա հանդիպման, Լապշինի և Ուելդանով-Գալուստյանի մասին (տեսանյութ)

Այսօր լրագրողների հետ ճեպազրույցում ՌԴ ԱԳՆ պաշտոնական ներկայացուցիչ Մարիա Զախարովան հայտարարեց, որ Լեռնային Ղարաբաղի հակամարտության խնդիրը առաջիկայում քննարկվելու է ՌԴ և Հայաստանի արտգործնախարարներ  Սերգեյ Լավրովի և Էդվարդ Նալբանդյանի միջև:

«Փետրվարի 21-22-ին ՌԴ արտգործնախարարի հրավերով պաշտոնական այց կկատարի Հայաստանի ԱԳ ղեկավարը: Այցը կդառնա հայ-ռուսական հագեցած  երկխոսության շարունակություն, ուղղված դաշնակցային համագործակցության հետագա զարգացմանը՝ քաղաքական, առևտրային և մարդասիրական ոլորտներում: Բանակցությունների ընթացքում նախատեսվում է քննարկել երկկողմանի համագործակցության կարևոր հարցեր, ներառյալ ԼՂ հակամարտության կարգավորումը», - ասաց նա:

Հայաստանի, Ադրբեջանի և Ռուսաստանի արտգործնախարարների եռակողմ հանդիպման մասին տեղեկատվություն դեռ չկա: 

Անդրադառնալով Ադրբեջանին արտահանձնված բլոգեր Ալեքսանդր Լապշինին, նա հայտարարեց, որ ՌԴ ԱԳՆ-ն մշտական վերահսկողության տակ է պահում նրա գործը: Մարիա Զախարովան հայտնեց նաև, որ Ադրբեջանում ՌԴ դեսպանատան աշխատակիցները փետրվարի 9-ին այցելել են Լապշինին: 

«Ռուսաստանցի դիվանագետների հետ հանդիպման ժամանակ պահման պայմանների վերաբերյալ բողոքներ չեն եղել: Դեսպանատունը մշտական կապի մեջ է գտնվում Ադրբեջանի իրավապահ մարմինների հետ, ինչպես նաև այդ երկրում Իսրայելի դեսպանության հետ: Ներկայում Լապշինին տրամադրվում է որակյալ փաստաբանական օգնություն», - ասաց նա:

Անդրադառնալով Բաքվում բերման ենթարկված Մարատ Ուելդանով-Գալուստյանին, Մարիա Զախարովան ասաց, որ. «Քննչական միջոցառումները, Բաքվում բերման ենթարկված ՌԴ քաղաքացի Մարատ Ուելդանով-Գալուստյանի նկատմամբ շարունակվում են: Նա շարունակում է պահվել Ադրբեջանի Պետանվտանգության ծառայության մեկուսարանում: Ուելդանովի պահման պայմանները համապատասխանում են եվրոպական չափանիշներին»:

Զախարովայի խոսքերով, Մարատ Ուելդանով-Գալուստյանի առողջական վիճակը բավարար է: Բացի այդ նա բուժման կուրս է անցել և ՌԴ ԱԳՆ-ն ունի բոլոր հաստատող փաստաթղթերը:

Zham.am