Համարձակ կիրգիզուհին՝ հանուն կանաց իրավունքների. Տեսանյութ. Լուսանկար

Կիրգիզիայում իսկական սկանդալի է վերածվել 19-ամյա երգչուհի Զերե Ասիլբեկի տեսահոլովակը, որտեղ աղջիկը մանուշակագույն ժանեկազարդ ներքնազգեստով և վառ շրթներով երգում է կանանց իրավունքների մասին, երգի բառերից է. «Երբ կգա ժամանակը, որ այլևս չասեն՝ այսպես արա, այսպես մի արա»:
Երիտասարդ աղջկա համարձակ տեսահոլովակը դուր չի եկել տեղացի տղամարդկանց: Ինչպես փոխանցում են լրատվամիջոցները, նրանք աղջկան սպառնում են հաշվեհարդարով: Անձնական նամակներով գրում են, որ գլուխը կկտրեն, պատմել է Զերեն:

Նույնիսկ Կիրգիզիայի նախկին վարչապետ Կուլովն է կոշտ և հեգնական ձևով անդրադարձել տեսահոլովակին՝ մեկնաբանելով, որ երգչուհին նման բուռն քննարկման չէր արժանանա, եթե նրա կազմվածքը իդեալական լիներ:

Զերեն ասել է, որ իր այդ հոլովակի պատճառներից մեկը աղջիկներին ստիպողաբար ամուսնացնելու սովորույթն է, այն բռնությունը, որ ապրում է Կիրգիզիայի գրեթե յուրաքանչյուր չորրորդ կինը, այն, որ աղջիկները ստիպված ամուսնանում են, երբ նրանց ուղղակի գողանում են, երբեն գողանում են անծանոթ մարդիկ, իսկ երբեմն էլ աղջկա ծնողների հետ պայմանավորվածությամբ: Նա ասել է, որ սովորաբար այդպիսի պատմությունները լռության են մատնվում:

Զերեն լրատվամիջոցներին պատմել է երիտասարդ մի աղջկա մասին, որը բժշկական քոլեջի ուսանող էր և պաատրաստվում էր ամուսնանալ սիրած տղայի հետ, սակայն տարիքով իրենից մեծ տղամարդը բռնի ուժով գողացել էր նրան: Մինչ աղջկա ծնողները հետապնդելով հասել էին նրանց հետևից, տղամարդը դանակահարել էր աղջկան և սպանել:

Չնայած կոշտ և սպառնալիքներով լի վերաբերմունքին երիտասարդ երգչուհին չի պատրաստվում հրաժարվել իր պայքարից: Նա ասել է, որ շարունակելու է երգել, անգլերեն սովորեցնել երեխաներին և զբաղվել հասարակական ծրագրերով:

Կիրգիզիայում վաղ ամուսնությունների խնդիրներին մոտ մեկ տարի առաջ իր յուրահատուկ մոտեցմամբ անդրադարձել է Սայքալ Ժումալիևան, ով տեսահոլովաում ներկայացել է գյուղական հարսնացուի դերում, որը "Staying alive" հիթի տակ ավելով պարում է: Այս տեսահոլովակը նույնպես մեծ աղմուկի պատճառ էր դարձել:

Մեկ այլ դեպք դարձյալ Կիրգիզիայում, նկարչուհի Ալիա Շագիևան՝ Կիրգիզիայի նախագահ Ալմազբեկ Աթամբաևի կրտսեր դուստրը, լուսանկար էր հրապարակել, որտեղ կրծքով կերակրում էր նորածին որդուն: Շագիևան պարբերաբար նմանատիպ անձնական լուսանկարներ է հրապարակել՝ արժանանալով հասարակության քննադատմանն ու պախարանքին: Նա գրում էր, որ մարդիկ մոռացել են թե ինչ նշանակություն ունի կնոջ կուրծքը և այն վերածել են տղամարդկանց քննարկման առարկայի: Սակայն երկարատև մեղադրանքներից հետո նա ստիպված հեռացրել է լուսանկարը:

Այս թեմային հետաքրքիր անդրադարձ է կատարել Ria.ru- ն՝ ուշագրավ փաստեր ներկայացնելով նաև Ուզբեկստանում և Տաջիկստանում կանանց իրավունքների առնչությամբ:

Zham.am