Կարեն Կարապետյանը կարող է նոր պաշտոն ստանալ Ռուսաստանում (Տեսանյութ)

Գարնանը Հայաստանում տեղի ունեցած իշխանափոխությունից հետո ՀՀ նախկին վարչապետ Կարեն Կարապետյանը կարող է ներառվել ռուսական «Զառուբեժնեֆտ» («Зарубежнефть») պետական նավթային ընկերության տնօրենների խորհրդի կազմում: Այդ մասին գրում է Kommersant.ru-ն՝ ենթադրելով, որ հիշյալ նշանակումը կարող է լինել ինչպես քաղաքական ժեստ, այնպես էլ ռուսական պետական ընկերություններում Կարապետյանի հարուստ փորձի (2000-2010թթ.) արդյունք: Ռուսաստանի իշխանությունները նախկինում էլ են կիրառել արտասահմանից հավատարիմ քաղաքական գործիչներին աշխատանքի հրավիրելու պրակտիկան: Այստեղ կարելի է նշել Գերմանիայի նախկին կանցլեր Գերհարդ Շրյոդերի օրինակը. նա ներառված է «Ռոսնեֆտ»-ի տնօրենների խորհրդի կազմում:

Ինչպես հաղորդել է ռուսական պարբերականի քաջատեղյակ աղբյուրը, Կարապետյանը կարող է անկախ տնօրենի պաշտոն ստանալ, որն այժմ զբաղեցնում է ֆինանսիստ Հրայր Սիմոնյանը:

Ռուսական պարբերականը նշում է, որ Հայաստանում մայիսյան իրադարձություններից հետո նախկին վարչապետը հանրային քաղաքականության մեջ չի նկատվել, նոր իշխանությունների կողմից էլ նրա որևէ պահանջ չի ներկայացվել: Փաշինյանի գլխավորած կառավարությունը վաղ նախաձեռնել էր Հայաստանի նախկին նախագահ Ռոբերտ Քոչարյանի և ՀԱՊԿ գլխավոր քարտուղար Յուրի Խաչատուրովի ձերբակալությունը: 

Արդյո՞ք Կարեն Կարապետյանի հավանական նշանակումը քաղաքական ենթատեքստ ունի, թե իրականում կապված է նրա նախկին բիզնես կարիերայի հետ, պարզ չէ:

Կարեն Կարապետյանի նախկին մամուլի խոսնակ Արամ Արարատյանն էլ նշել է, որ հավանական նոր նշանակման մասին տեղյակ չէ և այլև լիազորված չէ մեկնաբանել նրա հետ կապված տեղեկատվություն: 

TopContact-ից Արթուր Շամիլովը գտնում է, որ Կարապետյանի հավանական նշանակմամբ Ռուսաստանի Դաշնությունը, որը փորձում է լավ հարաբերություններ կառուցել ՀՀ նոր կառավարության հետ, հայկական վերնախավին ազդակ է ուղարկում առ այն, որ չի մոռանում նախկին քաղաքական առաջնորդներին: Ըստ Շամիլովի, դա հետևողական քաղաքականություն է: 

Zham.am