Աջ ղեկով մեքենաների ներմուծման մասին՝ ինչպես խոստացել էի

Դեռևս նախորդ կառավարությունը մի օր, ի վերջո, հիշեց, որ Հայաստանում երթևեկությունը աջակողմյան է և աջ ղեկով մեքենանաները կարող են անվտանգության խնդիրներ առաջացնել և որոշեց արգելել աջ ղեկով մեքենաների շահագործումը: Հասարակությունն էլ բնականաբար ընդվզեց, քանի որ բազմաթիվ քաղաքացիներ օբեկտիվ հարցադրում արեցին, թե ինչու տարիներ շարունակ չէր արգելվում՝ ներմուծել ենք և այս որոշումը կարող է սոցիալական ծանր ազդեցություն ունենալ: Հասարակության ձայնը հասավ տեղ այնքանով, որ իբրև թե գտնվեց կոմպրոմիսային լուծում՝ կարգելվի ներմուծումը:

Այս կիսատ-պռատ լուծմանը հաջորդեց իշխանափոխությունը (հեղափոխությունը) և կրկին խնդիրը դարցավ ակտուալ, հատկապես, երբ պարզվեց, որ ներմուծողների մի ստվար զանգված տեղյակ չէր անգամ, որ հոկտեբերից հետո ևս ներմուծում անել չի կարող՝ կար նաև իրազեկման խնդիր։

Հիմա կիսատ-պռատի մասին, երբ պետությունը որևէ ռեֆորմ անելուց առաջ բախվում է իրականում տեսանելի և առարկայական պրոբլեմի՝ տվյալ դեպքում սոցիալական, պետք է ռեալ քայլեր ձեռնարկի՝ գնահատելով սեփական ռեֆորմի բացասական հետևանքները: Ինչ ունենք այսօր՝ մեքենան գալիս է Վրաստան, աջ ղեկը դառնում է ձախ և ներմուծվում: Այս ընթացքում Վրաստանում աջ ղեկի տեղափոխման գինը կրկնապատկվում է, իսկ որոշ դեպքերում նաև 3 օրվա ընթացքում չի իրականացվում այս աշխատանքը, մեքենան մնում է Վրաստանում, իսկ ներմուծողը ստիպված լրացուցիչ գումարներ է վճարում։ Հետո զարմանում ենք՝ ինչպես է զարգանում Վրաստանը՝ չհասկանալով, որ զարգանում է մեր «խելացի» որոշումերի հաշվին: Ինչ Էր պետք և շարունակում է պետք լինել՝ այս նույն պրոցեսը ժամանակավոր տեղափոխել Հայաստան, անվտագության նկատառումներից ելնելով՝ հրավիրել մասնագիտացված ծառայություն մատուցող ընկերության, ով կարող էր իրականացնել պրոֆեսիոնալ տեղափոխություն, ստեղծել կապ տեղափոխող ընկերության և տեխ զննում ապահովող ընկերության միջև, այնուհետև նոր հստակ ժամկետ սահմանել ինչպես ներմուծման արգելքի, այնպես էլ շահագործման համար: Պայմանական՝ կարող եք ներմուծել ևս 1 տարի, իսկ շահագործել ևս 2 տարի: Ներդրողը կիմանար, որ Հայաստանում գործ կա, ոնց էլ չլինի մի քանի օր մաքսազերծումը կուշանար և համապատասխան վճարումներ կգոյանային, սոցիալական խնդիրն ու հանրային պահանջն էլ կլիներ բավարարված:

Բաբկեն Պիպոյանի ֆեյսբուքյան էջից