Որոշ պատգամավորների քծնանքը առ Փաշինյան, հիշեցնում էր Պարոնյանի «մեծապատիվ մուրացկաններին»

Այսօրվա Փաշինյանի ելույթից ոչ պակաս հետաքրքիր էր նաև, թե ինչպես էին որոշ պատգամավորներ քծնում նրան:

Հատկապես մրցակցությունն ընթանում էր որոշ նախկին ՀՀԿ-ականների ու որոշ ներկայիս ԲՀԿ-ականների միջև: Նշենք, որ վերջիններս բացարձակ «հաղթանակ» տարան ՀՀԿ-ականների նկատմամբ:

Նախկին ՀՀԿ-ականները հանդես էին գալիս պարզունակ քծնանքով, նախկինում նրանք քծնում էին Սերժ Սարգսյանին, իսկ այսօր, քանի որ նա պարտվել է և իր տեղը զիջել է, քծնում են Փաշինյանին:

Չգիտեմ, թե ի՞նչ ազդեցություն կունենա այս ամենը Փաշինյանի վրա, բայց հաստատ կարելի է արձանագրել, որ նրանք ունեն լուրջ մրցակից` ի դեմս որոշ ԲՀԿ-ականների, որոնք հիշեցնում են Նիկոլին, որ պարտվող նավից փախչող ՀՀԿ-ականներին չի կարելի հավատալ ու վստահել:

Այս ամենը դիտելիս ակամաից հիշեցի Հակոբ Պարոնյանի «մեծապատիվ մուրացկաններին» և սպորտային հետաքրքրություն առաջացավ, իսկ ինչպիսի՞ն կլինի Փաշինյանի վարքագիծը իր նոր «կողմնակիցների» հանդեպ: Ի՞նչ պաշտոններ կստանան նրանք և «Իմ քայլը» ցուցակի ո՞ր տեղում կհայտնվեն: Եվ այս ամենից հետո կլինի հասկանալ, թե ինչպիսի՞ն կլինի «Նոր Հայաստանի» վաղվա պատկերը:

Դավիթ Մկրտչյան