Արա Բաբլոյանը Տիգրան Ուրիխանյանին ներկայացրեց՝ թե որտեղ էր ավանտյուրան երեկվա ԸՕ քվեարկության հետ կապված

Այսօր՝ հոկտեմբերի 23-ին, Ազգային ժողովի հերթական նիստը մեկնարկեց պատգամավորների հայտարարություններով¸ կապված նոր Ընտրական օրենսգրքի ընդունման հետ: ԱԺ «Ծառուկյան» խմբակցության պատգամավոր Տիգրան Ուրիխանյանն իր ելույթի ժամանակ անդրադարձավ վարչապետ Նիկոլ Փաշինյանի երեկվա հայտարարությանը՝ կամ չունի¸ թե դեկտեմբերին կայանալիք ընտրությունները որ ԸՕ-ով տեղի կունենան:

«Ինձ համար զարմանալի է¸ որ մեր ՔՊ-ի հարգարժան գործընկերները վարչապետի գլխավորությամբ¸ երեկ հայտարարում են¸ թե Ազգային ժողովը պետք է որոշի¸ որ ԸՕ-ով գնալ ընտրությունների¸ իրենց համար միևնույն է¸ իրենք անցողիկ են: Խնդրում եմ բևեռեք ձեր ուշադրությունն այն հանգամանքի վրա¸ որ պետք է անցողիկ հնարավորություններ ստեղծել ընդհանրապես երկրում բոլորի համար հավասարապես¸ ոչ միայն ՔՊ-ի համար»¸ - ասաց Տիգրան Ուրիխանյանը:

Պատգամավորը նաև նկատեց¸ որ դա հնարավորություն է Հանրապետական կուսակցության համար նորից հայտնվել խորհրդարանում:

«Հանրապետականի պատգամավորներ էին¸ որոնք հանկարծակի դարձան հեղափոխական¸ գնում են իշխանության դռների առջև երդումներ են կազմակերպում իրենց համար այլևս՝ հեղափոխության նվիրյալների կերպարներով¸ և մեր թիկունքի հետևից նորից ռեյտինգայինով¸ նորից նախկին ընտրակարգով ճողոպրելու խորհրդարան»¸ - ասաց նա:

Տիգրան Ուրիխանյանը նշեց նաև¸ որ ԱԺ նախագահ Արա Բաբլոյանը տեղյակ էր թե որ պատգամավորը որտեղ էր և ինչու չներկայացան ԸՕ քվեարկությանը¸ կոչ անելով ՔՊ ներկայացուցիչներին օգնել ժողովրդին:

Երեկ ԸՕ քվեարկության տապալման վերաբերյալ Արա Բաբլոյանը ԱԺ ամբիոնից հայտարարեց¸ թե որտեղ է եղել ավանտյուրան:

«Պարոն Ուրիխանյան¸ դուք հիմա ցանկանում եք¸ որ ես հիմա պատասխանեմ այն՝ ինչը իրականությունն է: Շատ լավ: Այն ժամանակ կցանկանայի¸ որպեսզի ոչ միայն Ազգային ժողովը¸ այլև ամբողջ մեր բնակչությունը գնահատեր ավանտյուրան որտեղ է: Նախ¸ որպես ԱԺ նախագահ¸ ես տվեցի բոլոր հնարավորությունները¸ որպեսզի այն մարդիկ և այն խմբակցությունները¸ որոնք հայտարարել էին¸ որ կաջակցեն արտահերթ ընտրությունների պատշաճ անցկացնելու առումով ունենաին հնարավորություն գաին այս դահլիճ և մասնակցեին օրենքի քննարկմանն ու քվեարկությանը: Ունենալով 69 մարդ¸ որոնք հայտարարել էին իրենց համաձայնությունն աջակցելու¸ այստեղ մասնակցեցին 57-ը այն էլ իմ կողմից տրված լրացուցիչ ժամի հաշվին»¸ - ասաց ԱԺ նախագահը:

Zham.am