Նիկոլ Փաշինյանի արձագանքը Կապանի ընտրության արդյունքների վերաբերյալ մտահոգիչ է

Փաշինյանը, արձագանքելով անցած ընտրությունների արդյունքների վերաբերյալ, նշել է, որ այն թեկնածուները, որ հանդես են եկել, իր բնորոշմամբ, «թավշյա հեղափոխության դիրքերից», չնայած պարտվել են, ցանկություն են հայտնել ՔՊ անդամ դառնալ ու դա ներկայացվում է Փաշինյանի կողմից որպես ձեռքբերում: Իսկ ինչ վերաբերվում է ՔՊ-ի պարտությանը Կապանում, ապա նա նշել է, որ «ազատ ընտրությունը միշտ չէ, որ արտահայտում է ազատ կամարտահայտումը, և այդ ուղությամբ պետք է աշխատանք տարվի»:

Ուշադրություն դարձնենք նրա այն մտքի վրա, որ նա փաստացի ողջունում է պետական բյուրոկրատիայի սերտաճումը իր կուսակցության հետ: Քանզի, միթե պարզ չէ, թե ինչու՞ են նույնիսկ պարտված թեկնածուները ուզում անդամագրվեն ՔՊ-ին: Թվում էր, թե այս փաստը իրեն պիտի մտահոգեր, այլ ոչ թե ոգևորեր:

Եվ ճիշտ հակառակը, Կապանի հաղթած թեկնածուին նա պիտի շնորհավորեր և նշեր, որ պատրաստ է աշխատել նաև նրա հետ, չնայած նա ՔՊ-ի թեկնածուն չէր: Մանավանդ, որ նորընտիր քաղաքապետը նշել էր, որ դրական է տրամադրված Փաշինյանի հետ աշխատելու հարցում:

Սակայն բանից պարզվում է, այստեղ Փաշինյանը տեսնում է ոչ այդքան արդար կամարտահայտում: Փաստորեն, ըստ Փաշինյանի, արդար են այն ընտրությունների արդյունքները, որտեղ հաղթանակում են նրա կողմնակիցները:

Սա ցույց է տալիս, որ նրա խոսքերը , «բարիկադների քանդելու» վերաբերյալ, այդքան էլ անկեղծ չեն: Փաշինյանը, փաստորեն, իր պատկերացումներում բավականին միակողմանի է, ով փաստացի չի հանդուրժում այլ տեսակետի գործիչներ:

Իսկ սա նշանակում է, որ գալիք ԱԺ-ի ձևավորելուց հետո, Հայաստանին սպասվում են ծանր ժամանակներ:

Արտակ Հակոբյան