Կեցցե՛ ազատ Կապանը. ֆեյսբուքահայության արձագանքը Կապանում ՔՊ թեկնածուի պարտության մասին

Երեկ՝ հոկտեմբերի 21-ին, Հայաստանի չորս քաղաքներում՝ Հրազդանում, Արմավիրում, Էջմիածնում և Կապանում տեղի են ունեցել քաղաքապետի ընտրություններ: Ընտրությունների արդյունքներով Հրազդանում քաղաքապետ է ընտրվել Սասուն Միքայելյանի որդին՝ Սևակ Միքայելյանը, Արմավիրում՝ ՔՊ թեկնածու Դավիթ Խուդաթյանը, Էջմիածնում` ՔՊ թեկնածու Դիանա Գասպարյանը և Կապանում՝ անկուսակցական Գևորգ Փարսյանը:

Հարկ է նշել¸ որ աղմուկը քաղաքապետերի ընտրություններում ավելի շատ էր¸ քան մասնակցության ցուցանիշները: Մասնավորապես¸ Facebook սոցիալական կայքի հայկական տիրույթում ակտիվ քննարկման է արժանացել քաղաքապետի ընտրությունները Կապանում: Անկուսակցական Գևորգ Փարսյանը հաղթել է «Քաղաքացիական պայմանագիր» կուսակցության կողմից առաջադրված թեկնածու Նարեկ Բաբայանին: Ըստ նախնական տվյալների Գևորգ Փարսյանը ստացել է 10 507 ձայն, Նարեկ Բաբայանը՝ 8 499 ձայն:

Ոմանք նշում են¸ որ դա իշխանության պարտությունն է¸ ոմանք` պնդում¸ որ դա հաղթանակ է և ամբողջովին տեղավորվում է ժողովրդավարական հասարակարգի տիրույթում:

Ստորև Ձեզ ենք ներկայացնում ֆեյսբուքյան օգտատերերի տեսակետները ՏԻՄ ընտրությունների վերաբերյալ:

«Լուրեր են շրջանառվում, որ Կապանում Փաշինյանի թեկնածուի պարտության պատճառը Սյունիքում իդեմս Հունան Պողոսյանի, նախկին իշխանությունների վրա հենվելու կենտրոնական իշխանության քաղաքականությունն է։ Պարտության պատճառներից մեկն էլ նշվում է կենտրոնական իշխանությունների հակահանքարդյունաբերական քարոզը, ինչը հանքարդյունաբերությամբ ապրող Կապանը չէր կարող նորմալ ընկալել», - գրել է Դերենիկ Մալխասյանը։

Ֆեյսբուքյան օգտատեր Արա Պապյանն էլ դա դիտարկում է որպես հաղթանակ. «ՈմանքԿապանի ընտրությունների արդյունքները ներկայացնում են որպես Նիկոլ Փաշինյանի պարտություն: Ընդհակառակն, դա Նիկոլի և մեր բոլորիս հաղթանակն է: Երբ ՏԻՄ ընտրություններում կարող է պարտվել իշխող կուսակցության ներկայացուցիչը՝ նշանակում է երկիրը ապաքինման ընթացքի մեջ է:
Ինչքան իշխանության հանդեպ քննադատական մոտեցումը շատանա, այնքան նշանակում է, որ հեղափոխությունը հաղթում է: Կեցցե ժողովրդական հեղափոխությունը: Կորչեն ամբողջատիրական վարչակարգերը»:

«Փաստորեն Ղափանը դարձավ առաջին քաղաքը, որտեղ Մերժեցին Նիկոլին...»¸ - Արգիշտի Կիվիրյանի ֆեյսբուքյան էջից:

Կապանում իշխանության ներկայացուցչի պարտությունը¸ ասյօր՝ հոկտեմբերի 21-ին¸ լրագրողների խնդրանքով մեկնաբանեց նաև ՀՀ վարչապետ Նիկոլ Փաշինյանը Եվրասիական շաբաթի գագաթաժողովի շրջանակներում:

«Ցավում եմ¸ որ մենք ընտրություններում պարտություն կրեցինք¸ բայց մյուս կողմից ուրախ եմ¸ որ մենք ևս մեկ անգամ քայլ կատարեցինք արձանագրելու մեր հավատարմությունը թավշյա հեղափոխության արժեքներին»¸ - ասաց Նիկոլ Փաշինյանը և հավելեց¸ որ ոչ իշխանական թեկնածուները նույնպես հանդես են եկել հեղափոխության դիրքներից:
«Ինչպես նախկինում ասել եմ¸ և հիմա էլ ասում եմ¸ որ Հայաստանում ընտրությունների արդյունքները չեն կեղծվելու»¸ - ասաց վարչապետը:

Նիկոլ Փաշինյանը նաև նշեց¸ որ Կապանում իշխանության պարտությունը կապել Հունան Պողոսյանի նշանակման հետ նույնպես պետք չէ:

Zham.am