Թուրք ոստիկանները խուզարկում են Ստամբուլի մոտակայքում գտնվող անտառը, որտեղ կարող են գտնվել կորած սաուդացի լրագրողի մարմնի մնացորդները

Թուրքական ոստիկանությունը լայնածավալ խուզարկողական աշխատանքներ է իրականացնում Ստամբուլին հարակից «Բելգրադ» անտառի տարածքում և Յալովա քաղաքում՝ գտնելու կորած սաուդացի լրագրող Ջամալ Խաշուկջիի մարմնի մնացորդները, գրում է «ՀաբերԹյուրք»-ը:

Հայտնի է, որ սպասվում են նաև փորման աշխատանքներ:

Հիշեցնենք, որ ըստ թուրք իրավապահների վարկածի՝ Ստամբուլում Սաուդյան Արաբիայի հյուպատոսություն մտնելուց հետո անհետացած լրագրողը սպանվել է: Հյուպատոսարանը հերքել է այդ պնդումներն ու հավաստիացրել, որ Խաաշուկջին անհետացել է հյուպատոսության շենքից դուրս գալուց հետո:

Նշվում է, որ լրագրողի անհետացման օրը մի քանի կասկածյալ անձինք, դուրս գալով հյուպատոսության շենքից, ամենայն հավանականությամբ, մեքենաներով ուղղվել են անտառի կողմ:

Ավելի վաղ թուրքական լրատվամիջոցները հրապարակել էին Սաուդյան Արաբիայի քաղաքացի 15 կասկածյալների լուսանկարները, որոնք կորած լրագրողի՝ հյուպատոսություն մուտք գործելու օրն ինքնաթիռով ժամանել են Ստամբուլ, Խաշուկջիից առաջ մտել հյուպատոսարան ու ժամեր անց դուրս եկել այնտեղից կասկածելի պայուսակներով:

Նախօրեին ոստիկանները խուզարկել են նաև Սաուդյան Արաբիայի ստամբուլյան հյուպատոսի տունը: Ավելի վաղ թուրք իրավապահները 9 ժամից ավելի խուզարկություններ էին անցկացրել Սաուդյան Արաբիայի հյուպատոսարանի տարածքում:

Որոշ լրատվամիջոցներ, հղում կատարելով թուրքական ոստիկանության անանուն պաշտոնյաների, գրել էին, որ սաուդացի ընդդիմադիր լրագրողին հյուպատոսության շենքում կտտանքների են ենթարկել, սպանել ու մասնատել մարմինը: Կա վարկած, որ լրագրողի ձեռքին եղած «խելացի» ժամացույցը ձայնագրել է կտտանքները:

Աղբյուր