Հունան Պողոսյանին մարզպետի պաշտոնում նշանակելը նաև Փաշինյանի պատասխանն էր «Սասնա Ծռերին»
Այսօրվա կառավարության նիստի ժամանակ, մեկնաբանելով Հունան Պողոսյանի նշանակումը, վարչապետն այն միտքը հայտնեց, որ հեղափոխությունից հետո նախկին իշխանության ներկայացուցիչներից ոչ ոք չպետք է իրեն անտեսված զգա: Քանզի միայն նախկին իշխանության ներկայացուցիչ լինելու փաստի առթիվ քննադատությունը քաղաքական ռասիզմ է:
Հիշեցնենք, որ ընդամենը օրեր առաջ, «Սասնա Ծռերի» ներկայացուցիչ Վարուժան Ավետիսյանը Արայիկ Խանդոյանի թաղման օրը նշեց, որ ներկայիս ոստիկանապետը նույնպես հանցագործ է և պետք է կանգնի Հայստանի «նյուրնբերգյան» դատարանի առջև:
Թեև Ավետիսյանի խոսքերում չկար ուղակի քննադատություն Փաշինյանի հասցեին, պարզ էր, որ «Ծռերը» Փաշինյանին համարում են «ժամանակավոր» դաշնակից:
Դա հասկանում է նաև Փաշինյանը և պատասխանելով «Ծռերին» նշում է, որ արտահերթ ընտրություններից հետո հեղափոխությունը պիտի ավարտված համարվի, և հանրությունը չպետք է բաժանվի իրար հակառակորդների:
Հետաքրքիր պատկեր է ստացվում: Անցած՝ Երևանի ավագանու ընտրությունների ընթացքում հենց Փաշինյանը քաղաքական ուժերին բաժանեց «սևերի» ու «սպիտակների», իսկ այսօր նա 180 աստիճանով փոխում է իր տեսակետը և փորձում է «Ծռերի» համեմատ ավելի հանդուրժողական դիրքերից հանդես գալ:
Պարզ է, որ գալիք խորհրդարանական ընտրությունների ժամանակ «Ծռերը» հանդես են գալու, այսպես ասած, ավելի «սպիտակ ուժի» դիրքերից, քան Փաշինյանը: Վերջինս հայտնվելու է քաղաքական դաշտի կենտրոնում և կարծես թե փորձելու է հավասարակշռել ողջ դաշտը:
Սակայն դա առաջին հայացքից կարող է լինել ապահով Փաշինյանի համար, քանզի նա բոլորին թշնամացնելով, արդեն հավասարակշռողի դեր չի կարող կատարել, մյուս կողմից ժամանակի ընթացքում նրա վարկանիշը ամբոխի մոտ նվազելու է և ճիշտ հակառակը, աճելու է «Ծռերի» վարկանիշը:
Իսկ թե ինչին դա կհանգեցնի, և ինչ պիտի անի Փաշինյանը, որ չհայտնվի իր իսկ կողմից սարքած թակարդում, կնշենք մեր հաջորդ վերլուծությունում:
Արտակ Հակոբյան
Հետևեք մեզ Facebook-ում