Դատարանը վարույթ է ընդունել Սեդրակ Քոչարյանի հայցն ընդդեմ Արա Պապյանի
ՀՀ երկրորդ նախագահ Ռոբերտ Քոչարյանի որդու՝ Սեդրակ Քոչարյանի հայցն ընդդեմ քաղաքագետ, «Մոդուս Վիվենդի» կենտրոնի տնօրեն Արա Պապյանի, դատարանը վարույթ է ընդունել: Այդ մասին տեղեկացրել է Սեդրակ Քոչարյանի ներկայացուցիչ Անի Ալավերդյանը:
Հիշեցնենք, որ հայցվորը զրպարտության դիմաց փոխհատուցում ստանալու և հրապարակայնորեն այն հերքելու պահանջ է ներկայացրել՝ միաժամանակ պատասխանող կողմից 2 մլն դրամ փոխհատուցում պահանջելով։
Ըստ մամուլում առկա շրջանառվող տեղեկությունների` Սեդրակ Քոչարյանի դատարան հայցը վերաբերում է լրատվամիջոցներում Պապյանի հնչեցրած այն տեսակետին, թե Քոչարյանի ժամանակ Հայաստանի տնտեսությունը զարգացել է 8 անգամ, մինչդեռ կարող էր 18-20 անգամ զարգանալ, եթե գործարարների նկատմամբ ճնշումներ չլինեին:
Պապյանը նաև հայտարարել էր, թե անձամբ դեպքեր գիտի, որ մարդկանց ճնշել են, ծեծել, թույլ չեն տվել բջջային հեռախոսների ներկրման ու վաճառքի ոլորտում բիզնեսով զբաղվել, որովհետև դա եղել է Սեդրակ Քոչարյանի ոլորտը։
Հայցը մակագրվել է Երևան քաղաքի ընդհանուր իրավասության դատարան դատավոր Գոռ Թորոսյանին: