Մոսկվան եւ Երեւանը համագործակցում են՝ չնայած Հայաստանում անկայունության պահպանմանը. ՌԴ ԱԳ փոխնախարար

Ռուսաստանի եւ Հայաստանի միջեւ համագործակցությունը շարունակվում է, չնայած այս երկրում ստեղծված քաղաքական իրավիճակի անկայունությանը: Այդ մասին «Իզվեստիա» թերթին տված հարցազրույցում հայտարարել է Ռուսաստանի փոխարտգործնախարար Գրիգորի Կարասինը:

«Չնայած Հայաստանում որոշակի ներքաղաքական անկայունության պահպանմանը, համագործակցության կոնկրետ ոլորտներում համակարգված համատեղ աշխատանք է տարվում: Փոխադարձ առեւտրի դրական դինամիկան նշանակալից է. 2018 թվականի առաջին կեսին անցյալ տարվա նույն ժամանակահատվածի համեմատ աճը կազմել է 23.4 տոկոս` մինչեւ 925.6 մլն դոլար», - ասել է նա:

Կողմերը շարունակում են ակտիվ երկխոսություն պահպանել, վստահեցրել է դիվանագետը: «Հաշված ամիսների ընթացքում կայացել են ՌԴ նախագահ Վլադիմիր Պուտինի երեք հանդիպումները եւ Ռուսաստանի վարչապետ Դմիտրի Մեդվեդեւի երկու հանդիպումները վարչապետ Նիկոլ Փաշինյանի հետ:

«Մեր առաջնորդները հեռախոսով մի քանի անգամ շփվել են», - նշել է նա: Կարասինի խոսքով, Մոսկվայի եւ Երեւանի միջեւ նման հաճախակի հաղորդակցության արդյունքը կլինի Ռուսաստանի եւ Հայաստանի միջեւ հարաբերությունների հետագա ամրապնդումը «ինչպես երկկողմ ձեւաչափով, այնպես էլ ընդհանուր ինտեգրացիոն միությունների` ԵՏՄ, ՀԱՊԿ, ԱՊՀ շրջանակներում»:

Աղբյուր՝ NEWS.am