Արցախի ռազմական ինքնաբավության մակարդակը պետք է բարձրացվի (տեսանյութ)
Արցախի ՊԲ տեղեկատվության և հասարակայնության հետ կապերի բաժնի պետ Սենոր Հասրաթյանը իր ֆեյսբուքյան էջում գրել է.
«Հոկտեմբերի 4-ին ՊԲ «Տիգրանակերտ» զորավարժարանում խաղարկվեց մարտական հրաձգությամբ ցուցադրական գումարտակային մարտավարական զորավարժություն:
Այն առանձնահատուկ էր ժամանակակից մարտավարատեխնիկական հնարավորություններով օժտված մի շարք զինատեսակների ներգրավվածությամբ:
Այդ օրն առաջին անգամ, մարտականին առավելագույնս մոտեցված պայմաններում կիրառվեցին նաև նավարկային տեղորոշման համակարգերից անկախ գործող հայրենական արտադրության հարվածային անօդաչու թռչող սարքեր:
Հատկանշականն այն է, որ նշված անօդաչու թռչող սարքերը նախագծվել ու թողարկվում են Արցախի Հանրապետությունում և ունեն առաջադրված մարտական խնդիրը լիարժեք կատարելու բոլոր անհրաժեշտ չափորոշիչները:
Շատ կարևոր է, որ Արցախը սկսել է ԱԹՍ-ների սեփական արտադրությունը: Ղարաբաղը ռազմական իմաստով պետք է հնարավորինս դառնա ինքնաբավ, քանի որ ռազմական գործողությունների վերսկսման դեպքում Ադրբեջանը կարող է հարվածել ՀՀ-Արցախը միմյանց կապող երկու երակներին`Գորիս-Լաչին և Վարդենիս-Քարվաճառ-Մարտակերտ ճանապարհներին`ՀՀ-ից օգնությունը խաթարելու համար: Այս պարագայում Արցախի համար կարևոր է ունենալ թե սեփական ռազմական արդյունաբերությունը, ռազմական գործարաններն ու ռազմա-տեխնիկական սպասարկման ողջ լոգիստիկան: ՀՀ-Արցախ ռազմա-տեխնիկական համագործակցությունը պետք է բարձրացվի որակական նոր մակարդակի`այդ թվում Արցախի համար կադրերի պատրաստման ու վերապատրաստման առումով:
Բացի ռազմական իմաստով ինքնաբավ դառնալուց Արցախը պետք է ուժեղացնի ու բազմաշերտ առաջնագիծ կառուցի`ինժեներական բարդ կառույցներով, մի քանի պաշտպանական բնագծերով, խրամատային ցանցով`օպերատիվ և այլ խորությունների վրա`Ադրբեջանի հարձակման դեպքում նրանց կորուստները առավելագույնին հասցնելու նպատակով: Արցախում պետք է կառուցվի հայկական «Մաններհեյմի պաշտպանական գիծ»`անվտանգության գոտու որոշ հատվածների հաշվին`հակատանկային պատնեշներ, ականապատ դաշտեր, գետերի, լեռնային տեղանքի ճիշտ օգտագործում և այդ վայրերում նոր հենակետեր կառուցելու հաշվին:
Բացի այդ, Արցախի քաղաքներն ու բնակավայրերը պետք է ունենան որակյալ ռմբապաստարաններ, քաղպաշտպանության մակարդակը պետք է որակապես փոխվի, ինչպես նաև յուրաքանչյուր գյուղ վերածվի յուրատեսական «հենակետի»`դիվերսիոն և այլ ներթափանցման պարագայում մարտն ընդունելու և օգնություն սպասելու համար որոշակի ժամանակահատված դիմադրելու համար:
Դա ենթադրում է մոբռեսուրսի ակտիվ նախապատրաստություն, մարզումներ, գյուղերում զինապահեստների ստեղծում` ՊԲ-ի և մարզային զինկոմիսարիատների վերահսկողության ներքո:
Արցախը պետք է վերածվի բոլոր առումներով`տնտեսական, ռազմական և այլն, անառիկ ամրոցի ու ինքնաբավության բարձր մակարդակի`պատերազմի դեպքում ՀՀ-ից`մայր-հայրենիքից «կտրվելու» պարագայում ունենալու համար պատրաստի լուծումներ ցանկացած իրավիճակի համար:
Արտեմ Բալասանովի ֆեյսբուքյան էջից
Հետևեք մեզ Facebook-ում