Նիկոլ Փաշինյանը քաղաքացիների ԱԺ տարածք մուտք գործելու և բանակցությունների մասին (տեսանյութ)

ՀՀ վարչապետ Նիկոլ Փաշինյանը խորհրդարանում կբանակցի խորհրդարանական ուժերի ներկայացուցիչների հետ:

ԱԺ-ում լրագրողների հետ զրույցում նա ասաց, որ կփորձի իմանալ գործընկերների տեսակետը, թե ինչպես պետք է հաղթահարեն ստեղծված իրավիճակը: Հաղորդում է Tert.am-ը:

Հարցին, թե ինչպես է պատկերացնում հանգուցալուծումը, Նիկոլ Փաշինյանն ասաց. «Պատկերացնում եմ, որ մենք համաձայնության կգանք, որ արտահերթ խորհրդարանական ընտրություններ անցկացվեն, ես հրաժարական կտամ, և իրենք վարչապետի թեկնածու չեն առաջադրի՝ պարզապես մարդկանց չգրգռելու համար, որովհետև երբ ես հրաժարական տված լինեմ, ու իրենք թեկնածու առաջադրեն, դա մարդկանց կբորբոքի: Ես հույս ունեմ, որ մեր գործընկերներն իրավիճակը ճիշտ կգնահատեն»:

Հարցին, թե համաձայնագիր կստորագրե՞ն, որ մյուս քաղաքական ուժերը վարչապետի թեկնածու չեն առաջադրի, Նիկոլ Փաշինյանն ասաց, որ վատ չի լինի նաև համաձայնագիր ստորագրել:

Հարցին՝ եթե իրավիճակը ճիշտ չգնահատեն, ինչ է պատրաստվում անել վարչապետը, Նիկոլ Փաշինյանն ասաց, որ կարծում է, որ բոլոր որոշումները կկայացվեն իրավիճակին համարժեք:

Հարցին,թե ինչ հիմքով ցուցարարները մուտք գործեցին ԱԺ տարածք, երբ նման որոշում չկա, վարչապետն ասաց, որ ինչպես Բաղրամյան 26-ում դռները բացվեցին, այնպես էլ այստեղ դռները բացվեցին:

ԱԺ-ում լրագրողների հարցերին պատասխանելուց հետո Նիկոլ Փաշինյանը ֆեյսբուքյան իր էջի ուղիղ հեռարձակման միջոցով խորհրդարանի բակում գտնվող ցուցարարներին հորդորեց խաղաղ ակցիա իրականացնել և հիշել իրենց սկզբունքների մասին. «Եթե խորհրդարանի որևէ պատգամավոր շենքից դուրս կգա և կցանկանա տարածքը լքել, ճանապարհ բացե՛ք և առանց որևէ վիրավորանքի, առանց որևէ տհաճության թողե՛ք, որ մարդիկ անցնեն»:

Մանրամասները՝ Tert.am-ում