Նիկոլ Փաշինյանը կհրավիրվի քննիչ հանձնաժողով. Գևորգ Կոստանյան (տեսանյութ)

Ազգային ժողովում ԱԱԾ տնօրենի և ՀՔԾ պետի հեռախոսազրույցի գաղտնալսման հարցով Քննիչ հանձնաժողով կհրավիրվի նաև վարչապետ Նիկոլ Փաշինյանը։ Այդ մասին «Ազատության» հարցին ի պատասխան ասաց հանձնաժողովի նախագահ Գևորգ Կոստանյանը։

«Ազատությունը» մասնավորապես հետաքրքրվեց Կոստանյանից, թե արդյո՞ք հանձնաժողով են հրավիրվելու նաև Ազգային անվտանգության ծառայության տնօրեն Արթուր Վանեցյանը, Հատուկ քննչական ծառայության պետ Սասուն Խաչատրյանը, վարչապետ Նիկոլ Փաշինյանն՝ այն անձինք, ում անունները շոշափվել են հեռախոսազրույցում։

«Միանշանական է, որ այդ ձեր նշված անձինք ինչ-որ մի փուլում հրավիրվելու են հանձնաժողովի նիստին», - պատասխանեց Քննիչ հանձնաժողովի նախագահը։

Կոստանյանը նշեց, որ Քննիչ հանձնաժողովի այսօրվա նիստում կազմել են հարցումների ցուցակը և բովանդակությունը։

«Հարցումների արդյունքում ստացված տեղեկատվության արդյունքում մենք արդեն կազմելու ենք հրավիրման ենթակա բոլոր անձանց նախնական ցուցակը և, բնականաբար, յուրաքանչյուր փաստաթղթի ուսումնասիրության արդյունքում, լրացուցիչ առաջանալու են այլ անձանց՝ պաշտոնատար բազմաթիվ անձանց հրավիրելու անհրաժեշտություն, խոսքը վերաբերում է հատկապես հեռախոսային խոսակցությունների գաղտնիության ապահովման և այդ ապահովման համար պատասխանատու սուբյեկտների ներգրավմանը, որովհետև մեզ համար առաջնահերթ է և՛ սահմանադրական, և՛ ազգային անվտանգությունը, որպեսզի մենք վստահ լինենք, որ Հայաստանի Հանրապետությունում որևէ մեկը չի կարող դառնալ ապօրինի գաղտնալսման զոհ», - ասաց Կոստանյանը՝ շարունակելով. - «Մենք ընդունելի համարեցինք նաև այն հանգամանքը, որ մենք քննարկման առարկա դարձնելու ենք անգամ մինչև այս ապօրինի գաղտնալսումը, նաև նախկինում տեղի ունեցած ապօրինի բոլոր գաղտնալսումների հանգամանքը՝ նկատի ունենալով, որ մենք պետք է հասկանանք՝ ինչքանո՞վ է մեր պետական ապարատը, ինչքանո՞վ է օրենսդրական բազան հիմնավոր և բավարար, որպեսզի ունակ լինի ապահովել մարդու սահմանադրական իրավունքի իրացումն այս հարցում առնվազն»։

Մանրամասները՝ Ազատության տեսանյութում