Ոստիկանության գործողությունները ԲՀԿ գրասենյակում եղել են օրինական. Նիկոլ Փաշինյան (Տեսանյութ)

Վարչապետ Նիկոլ Փաշինյանն այսօր դստեր հետ Երևանի ավագանու ընտրություններին քվեարկություն է կատարել մայրաքաղաքի թիվ 8/16 ընտրատեղամասում:

Քվեարկությունից հետո, պատասխանելով լրագրողների հարցերին, վարչապետը նշել է. «Այս ընտրությունները տարբերվելու են նրանով, որ քաղաքացին վստահ է, որ ընտրությունն ինքն է կատարելու, և իր ձայնը չի գողացվելու: Եթե նկատվեն ընտրակեղծարարներ, նրանք կսկսեն բողոքել ոստիկանության գործողություններից»:

Նիկոլ Փաշինյանի խոսքով՝ այս ընտրարշավն իրական էր, և բոլոր ուժերը հասկանում էին, որ պետք է պայքարեն յուրաքանչյուր ձայնի համար: «Ցանկացած ժողովրդավարական երկրում ընտրարշավի ժամանակ կրքեր են բորբոքվում, և կարծում եմ՝ սրանից հետո Հայաստանում ընտրարշավի ընթացքում կրքեր են բորբոքվելու, որովհետև ընտրությունները լինելու են իրական: Պետք է սովորել իրական ընտրությունների և իրական քարոզարշավի», - ասել է վարչապետը։

«Եթե լինի որևէ ապացույց ոստիկանության գործողությունների ապօրինության մասին, դա պետք է քննարկվի, բայց ես կարծում եմ, որ ոստիկանության գործողությունները եղել են հիմնավորված, օրենքով սահմանված կարգով», - լրագրողներին նաեւ ասաց Ն.Փաշինյանը։

NEWS.am-ի հարցին, թե ում նկատի ուներ վարչապետը, եր հայտարարում էր, թե որոշ ուժեր դեմ են խորհրդարանական ընտրություններին եւ «քուչեքում պայմանավորվում են ՀՀԿ-ի հետ», Փաշինյանը պատասխաբեց. «Ովքեր ասում էին, որ իրենք դեմ կլինեն խորհրդարանական ընտրություններին, կամ կարող է դեմ լինեն, կամ երեւի դեմ լինեն, կամ եթե էսպես լինի, դեմ կլինեն, իրենք էին իրենց հայտարարություններն արել»:

Մանրամասները՝ NEWS.am-ի տեսանյութերում:

Zham.am