Սփյուռքի նախարարը Սիրիայում հանդիպում ունեցավ Հալեպի նահանգապետ Հուսեյին Դիաբիի և հայ համայնքի ներկայացուցիչների հետ (լուսանկարներ)

Այսօր Դամասկոսից մեկնեցի Հալեպ և հանդիպում ունեցա Հալեպի նահանգապետ Հուսեյին Դիաբիի հետ: Հալեպի նահանգապետը հանդիպման ընթացքում ընդգծեց մեր ազգերի միջև եղած բարեկամության կարևորությունը և շնորհակալություն հայտնեց հայ ժողովրդին և Հայաստանի Հանրապետության կառավարությանը պատերազմի ընթացքում սիրիական ժողովրդին աջակցելու համար:

Այնուհետև շրջեցի Հալեպի Նոր գյուղ հայկական թաղամասում, հանդիպեցի ու զրուցեցի այնտեղ բնակվող սիրիահայերի հետ, ծանոթացա նրանց առօրյային:
Առանձին հանդիպում ունեցա նաև Հալեպի հայ համայնքային կառույցների ղեկավարների և ներկայացուցիչների հետ: Հանդիպմանը ներկա էին Հայոց Բերիո թեմի առաջնորդ Գերաշնորհ Տեր Շահան արքեպիսկոպոս Սարգիսյանը, Կաթողիկե Հայոց Եկեղեցու Բերիո թեմի առաջնորդ Արժանապատիվ Տեր Պետրոս արքեպիսկոպոս Միրիաթյանը, Սիրիայի Հայ Ավետարանական համայնքի համայնքապետ Վերապատվելի Հարություն Սելիմյանը, Հայ Հեղափոխական Դաշնակցության կուսակցապետ Կարօ Եուզպաշյանը, Սոցիալ Դեմոկրատ Հնչակյան կուսակցության կուսակցապետ Ավետիս Խոշաֆյանը, Ռամկավար Ազատական կուսակցության ատենապետ Կարօ Շուշանյանը, ՀԲԸՄ Սիրիայի Շրջանակային հանձնաժողովի ատենապետ Ներսես Ներսոյանը, Սիրիայի Օգնության Խաչի շրջանային վարչության ատենապետուհի Հռիփ Կանանյանը, Սիրիայի Խորհրդարանի պատգամավոր Ժիրայր Ռեիսյանը, «Գանձասար» շաբաթաթերթի գլխավոր խմբագիր Զարմիկ Չիլաբոշյան-Պողիկյանը:
Երեկոյան Հալեպում ՀՀ գլխավոր հյուպատոսությունում մասնակցեցի Հայաստանի Հանրապետության անկախության 27-րդ տարեդարձին նվիրված միջոցառմանը և հանդես եկա ելույթով: Հանդիսությանը մասնակցում էին սիրիահայ համայնքի շուրջ 450 ներկայացուցիչներ:

***

Ահա այս մարդկանց շնորհիվ է, որ իմ այցը Սիրիա վերջապես իրականություն դարձավ, խոսքը Սիրիայում ՀՀ արտակարգ և լիազոր դեսպան Արշակ Փոլադյանի և Հալեպում ՀՀ գլխավոր հյուպատոս Արմեն Սարգսյանի մասին է:

Մեր դիվանագետները պատերազմի ողջ ընթացքում ոչ մի վայրկյան չթողեցին Դամասկոսն ու Հալեպը, մինչդեռ Սիրիայում իրավիճակը դեռ լարված է: Երեկ՝ հյուպատոսության շենքի մոտ իմ ելույթից կես ժամ առաջ, պայթյուն լսվեց. շենքից 600մ հեռավորության վրա գտնվող թաղամասերից մեկը հրթիռակոծվեց: Դժբախտաբար, 6 զոհ է եղել: Այս ծանր պատմությունը ներկայացնում եմ, որպեսզի պատկերացնեք, թե ինչ պայմաններում են աշխատել ու շարունակում իրենց առաքելությունը մեր դիվանագետները:

Հարգարժան պարոն դեսպան և հյուպատոս, հպարտանում եմ ձեզնով այնպես, ինչպես հալեպահայերով, դուք բոլորդ հերոսներ եք:

***

Շրջայց Հալեպի Նոր գյուղ հայկական թաղամասում:

ՀՀ Սփյուռքի նախարար Մխիթար Հայրապետյանի ֆեյսբուքյան էջից