Դատախազությանը կոչ ենք անում գնահատել ոստիկանության աշխատանքի իրավաչափությունը. ԲՀԿ ավագանու թեկնածուներ (Տեսանյութ)

«Բարգավաճ Հայաստան» կուսակցության կողմից քաղաքապետի թեկնածու առաջադրած Նաիրա Զոհրաբյանը, ավագանու թեկնածուներն այսօր հրավիրված մամուլի ասուլիսին անդրադարձան ոստիկանության տարածած տեսանյութին, որում ասվում է, որ ավագանու իրենց թեկնածու Մարկոս Հարությունյանն ավտոշարասյունով է շրջում։ Հաղորդում է Tert.am-ը:

Մարկոս Հարությունյանը նշեց, որ ոստիկանության տարածած հաղորդագրությունն իրականությանը չի համապատասխանում: Նա պատմեց, որ երբ երկու օր առաջ քարոզարշավի շրջանակներում Շենգավիթում է գտնվել, ընկերներն առաջարկել են գալ նախընտրական շտաբ:

«Աջափնյակի ճանապարհին՝ Պռոշյան փողոցում, «մասկաներով», որքան հիշում եմ «ավտոմատներ» կային, մեզ բառիս բուն իմաստով փռցին ասֆալտին: Երբ հրահանգեցին կանգնել, ես ձեռքերս պարզած կանգնել եմ, իմ հագին եղել է ԲՀԿ շապիկը և երբ հարցրել եմ, թե ինչու են կանգնեցնում, պատասխան չեն տվել:

Երկու րոպե պահելուց, նկարահանումները վերջացնելուց հետո ասում են կարող ես գնալ»,- ասաց նա և նշեց, որ ոստիկանները սխալ են թույլ տվել։

Պետրոս Ղազարյանն իր հերթին նշեց, որ այս դեպքը չեն գնահատում որպես քաղաքական հետապնդում: «Չենք համարում սա մեր քաղաքական ուժի համար ճնշում է, բայց գալիս ենք ավելի վատ եզրակացության, քան եթե ճնշում լիներ մեր դեմ»,- ասաց նա և նշեց, որ սա իրենց դեմ չէ, քանի որ այսօր արդեն բոլորը իմացան իրենց ավագանու յոթերորդ համարին:

Նա նշեց, որ չկա օրենքում որևէ արգելք՝ շարասյունով երթևեկելու համար և նկատեց, որ հարսանիքները, թաղումները շարասյունով են երթևեկում:

«Իրենց տարածած տեսանյութով որևէ օրենքի խախտում չի եղել, զանցանք չի եղել, բայց մարդկանց պառկացրել են գետնին, և ամենավատը նկարել և տարածել են՝ մարդկանց ներկայացնելով հանցագործ»,-ասաց նա:

Պետրոս Ղազարյանը կոչ արեց դատախազությանը՝ գնահատել արդյոք իրավաչափ է ոստիկանության աշխատանքը: Նա նշեց, որ ոստիկանապետ Վալերիյ Օսիպյանը Լևիտանի ձայնով իրեն մեղադրում է ոչ պրոֆեսիոնալիզմի մեջ: «Սա քաղաքական ենթատեքստ չունի, սա զուտ ոստիկանության պրոֆեսիոնալիզմով է բացատրվում»,-ասաց նա:

Աղբյուր՝ Tert.am