Կարևոր չէ՝ ինչ է լինելու գլխավոր քարտուղարի ազգանունը՝ նա պետք է լինի Հայաստանի ներկայացուցիչը. Նիկոլ Փաշինյան

ՀՀ վարչապետ Նիկոլ Փաշինյանը ծավալուն հարցազրույց է տվել «Коммерсант» թերթին, որում անդրադարձել է նաև ՀԱՊԿ գլխավոր քարտուղար Յուրի Խաչատուրովի շուրջ ստեղծված իրավիճակին: 

«Ինչո՞ւ է մեկնաբանվում այնպես, իբր ինչ-որ մեկի համար ՀԱՊԿ-ն ավելի արժեքավոր է, քան Հայաստանի: Դա այդպես չէ: ՀԱՊԿ-ը մեզ համար նույնքան թանկ է, որքան կառույցի մյուս անդամների համար: Գլխավոր քարտուղարի պաշտոնում Հայաստանի ներկայացուցչի աշխատանքի համար կա ժամկետ, որը դեռ չի սպառվել: Մենք ունենք առնվազն մեկուկես տարի: Կարևոր չէ՝ ինչ է լինելու գլխավոր քարտուղարի ազգանունը: Նա պետք է լինի Հայաստանի ներկայացուցիչ ժամկետի ողջ ընթացքում», - ասաց ՀՀ վարչապետը:

Նիկոլ Փաշինյանը նաև մանրամասնեց, որ Վլադիմիր Պուտինի հետ այս հարցի քննարկման ժամանակ պայմանավորվել են փորձել հասնել փոխհամաձայնության բոլոր գործընկերների կողմից: Երբ կողմերը նման պայմանավորվածություն ձեռք կբերեն՝ կհայտարարեն:

Փաշինյանը նաև նկատեց, որ կա ընդհանուր նպատակ՝ բարձրացնելու ՀԱՊԿ-ի արդյունավետությունը: 

«Եկեք չմոռանանք, որ սա նաեւ մեր կառույցն է: Պետք չէ մտածել, որ մեկը շատ է մտածում դրա հեղինակության մասին, իսկ մյուսը չի մտածում ու կառույցի հեղինակությունը թանկ չէ մյուսի համար: Ես կարող եմ ձեզ երաշխավորել, որ Հայաստանի համար սա շատ կարևոր կազմակերպություն է: Մեզ համար շատ կարևոր է, որ այն լինի իսկապես արդյունավետ»,- ասաց ՀՀ վարչապետը:

Փաշինյանը նաև հիշեցրեց, որ Ադրբեջանի հետ պատերազմի դեպքում ՀԱՊԿ-ը պետք է օգնության գա Հայաստանին, հղում անելով պայմանագրին:

Zham.am