Այն շինությունը, որտեղ զենք է հայտնաբերվել, մեր ընտանիքի հետ կապ չունի․ Արգամ Աբրահամյան
Սխալ են ասել` մեր ընտանիքի հետ հողատարածքը, շինությունը, զենքը կապ չունեն։ Այս մասին լրագրողների հետ զրույցում ասաց ԱԺ «Ծառուկյան» խմբակցության պատգամավոր, նախկին վարչապետ Հովիկ Աբրահամյանի որդին՝ Արգամ Աբրահամյանը՝ անդրադառնալով ԱԱԾ հաղորդագրությանը, թե ապօրինի զենք է հայտնաբերվել Հովիկ Աբրահամյանին փաստացի պատկանող տարածքում։ Հաղորդում է Tert.am-ը:
Արգամ Աբրահամյանը նաև ասաց, որ Հովիկ Աբրահամյանն առնչություն չունի 2008թ-ի մարտի 1-ին կատարված գործողությունների հետ։
Արգամ Աբրահամյանը հիշեցրեց, որ Հովիկ Աբրահամյանը ևս հերքել է տարածված տեղեկատվությունը։
Հիշեցնենք՝ ՀՀ հատուկ քննչական ծառայության վարույթում գտնվող, 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած դեպքերի վերաբերյալ քրեական գործի շրջանակներում ՀՀ ազգային անվտանգության ծառայության աշխատակիցների կողմից իրականացված օպերատիվ-հետախուզական միջոցառումների արդյունքում տվյալներ են ստացվել, որ ՀՀ նախկին վարչապետ Հովիկ Աբրահամյանին փաստացի պատկանող, Ամբիկ Գևորգյանի անվամբ ձևակերպված՝ ՀՀ Արարատի մարզի Մխչյանի նախկին մեխանիկա-վերանորոգման գործարանում ապօրինի պահվում է մեծ քանակությամբ զենք և ռազմամթերք:
Հովիկ Աբրահամյանի եղբայրը ձերբակալվել էր, այնուհետև՝ կալանավորվել։
Հետևեք մեզ Facebook-ում