Աղվան Պետրոսյանն ազատ է արձակվել կալանքից

Գեղարքունիքի մարզի ընդհանուր իրավասության դատարանի՝ ավելի քան 23 000 դոլար կաշառք ստանալու մեջ մեղադրվող նախագահ Աղվան Պետրոսյանն ազատ է արձակվել կալանքից:

Այս մասին Tert.am-ի հետ զրույցում ասել է Աղվան Պետրոսյանի պաշտպան Արմեն Մելքոնյանը:

«Դատավոր Աննա Դանիբեկյանը բավարարեց Աղվան Պետրոսյանին կալանքից ազատելու վերաբերյալ միջնորդությունը, դատավորն ազատ արձակվեց ԱԺ պատգամավորներ Սուրեն Մանուկյանի և Հրաչյա Հակոբյանի անձնական երաշխավորությամբ»,- ասել է պաշտպանը:

Բացի դրանից, Մելքոնյանը հայտնեց, որ կալանքից 5 մլն դրամ գրավի դիմաց ազատ է արձակվել նաև գործով ամբաստանյալ, Գեղարքունիքի մարզի դատարանի դատավոր Վանիկ Վարդանյանը և Աղվան Պետրոսյանի վարորդ Կարեն Մատիկյանը՝ 1,5 մլն դրամ գրավի դիմաց:

Նշենք, որ գործով 13 ամբաստանյալ կա՝ Գեղարքունիքի մարզի դատարանի արդեն նախկին նախագահ Աղվան Պետրոսյանը, նույն դատարանի դատավոր Վանիկ Վարդանյանը, դատախազ Սևակ Շհոյանը և քաղաքացիներ Կարեն Մարտիկյանը, Հայկ Կարապետյանը, Մելանյա Գալստյանը, Կամո Գալստյանը, Էդվարդ Չինարյանը, Ռոբերտ Գրիգորյանը, Խաչատուր Դադոյանը, Արմեն Բարսեղյանը, Վրույր Վարդանյանը, Լաուրա Մարտիրոսյանը: