Ո՞րն է Սերժ Սարգսյանի և ՀՀԿ-ի պլանը

Վարչապետ Կարեն Կարապետյանի նշանակումն ու նախարարների փոփոխությունը շատերի մոտ հույս արթնացրեց, որ Հայաստանի հանրապետական կուսակցությունը գուցե «հավատացել և փոխվել է», կամ գոնե փորձում է: Սակայն որքան մոտենում են Խորհրդարանական ընտրությունները, այնքան պատկերն ավելի է ուրվագծվում. ՀՀԿ-ում ոչ միայն մտադիր չեն փոխվել, այլև չեն հրաժարվելու «հին ավանդույթներից»:

Ավելին, ՀՀԿ-ն այս Խորհրդարանական ընտրություններում գործի է դնելու իր ողջ զրահատեխնիկան (անգամ պահուստայինը)՝ ի դեմս իր հավատարիմ կարկառունների ու նրանց ժառանգների:

Մամուլում հաճախ են հրապարակումներ լինում ՀՀԿ ցուցակի նախնական կազմի մասին: Իհարկե, մինչև վերջնական ցուցակը չհրապարակվի, հաստատ ոչինչ ասել չենք կարող, սակայն, ինչպես ասում են, առանց կրակ ծուխ չի լինում:

Եթե հավատանք մամուլի հրապարակումներին, ապա ՀՀԿ ցուցակում են լինելու կամ առնվազն մարզային, քաղաքային, թաղային մակարդակում ՀՀԿ-ին սատարելու են Սյունիքի «հեղինակավոր» նախկին մարզպետ Սուրիկ Խաչատրյանը, Մշակույթի ոչ այդքան, բայց «հեղինակավոր» նախկին նախարար Հասմիկ Պողոսյանը, ԴԱՀԿ-ի Միհրանի քեռորդին, Գալուստ Սահակյանի որդին և նման այլ կերպարներ ու վերջիններիս հարազատությունը:

Ըստ երևույթին Սերժ Սարգսյանն ու իր թիմը հույսը դրել են այն հանգամանքի վրա, որ հանրության լայն շրջանակներում ՀՀԿ-ի «կարկառունների» հարազատներն ու որդիներն այնքան էլ հայտնի չեն, սակայն Հայաստանը փոքր է և ամեն ինչ շատ արագ է իմացվում:

Դատելով ՀՀԿ ցուցակում ընդգրկվող անձանց շրջանառվող անուններից՝ կարելի է եզրակացնել, որ «հին ավանդույթի» համաձայն Սերժ Սարգսյանը մտադիր է զարկ տալ «թաղային», «գողական» և «կիսագողական» հեղինակություններին, որոնք էլ կապահովեն հիմնական մարդաորսը: Անշուշտ, գործի կդրվի նաև ՀՀԿ-ի ծանր հրետանին՝ «մեռյալները» նորից վեր կհառհնեն, կկատարեն իրենց քաղաքացիական պարտքն ու կրկին հանգիստ կննջեն երկար ու խորը քնով՝ մինչև հաջորդ ընտրություններ:

ՀՀԿ-ի պլաններում, անշուշտ, կա նաև Կարեն Կարապետյանի և նրա կառավարության վարկանիշն օգտագործելը՝ որպես հիմնական զենք:

Սակայն, հանրությունն առ այսօր Կարեն Կարապետյանին չի ասոցացնում ՀՀԿ-ի հետ, նույնիսկ 7000-անոց բանակով ՀՀԿ մտնելուց հետո: Սա հաշվի առնելով՝ կարող ենք ենթադրել, որ գալիք Խորհրդարանական ընտրություններում Կարեն Կարապետյանի մասով Սերժ Սարգսյանի պլանը կարող է առհասարակ չաշխատել:

Հասմիկ Գրիգորյան
Լուսանկարը՝ «Ֆոտոլուրի»