Ովքեր հայտարարում են, որ «Մարտի 1»-ին իմ անվտանգության աշխատակիցները ժողովրդի դեմ են դուրս եկել, դրանք մեր թշնամիներն են. Գ. Ծառուկյան

ԲՀԿ առաջնորդ Գագիկ Ծառուկյանն այսօր Երևանի ընտրություններին ԲՀԿ ավագանու ցուցակի ներկայացուցիչների հետ հանդիպմանը նշեց, որ ինքը ավագանու ընտրություններին ընդառաջ ընտրակաշառք տալու մասին չի հանձնարարել, այդ մասին խոսակցությունները իրականությանը չեն համապատասխանում: «Ով խոսում է ավել-պակաս, դրանք մեր թշնամիներն են, տիկին Զոհրաբյանն այդքան գումարներ չունի, որ պայմանավորվի, ո՛չ պարոն Ղազարյանը, ո՛չ էլ պարոն Աբովյանը»,-շեշտեց նա:

Գագիկ Ծառուկյանն ասաց, որ կաշառքի մասին խոսք լինել չի կարող, բացառված է: Նա ընդգծեց, որ խորհրդարանում կողմ են քվեարկելու ընտրակաշառքը քրեականացնելուն:

Հանդիպման ավարտից հետո լրագրողների հետ զրույցում պատասխանելով Tert.am-ի հարցին՝ Գ. Ծառուկյանն ասաց, որ նա, ով հայտարարում է, որ «Մարտի 1»-ին իր անվտանգության աշխատակիցները ժողովրդի դեմ են դուրս եկել, անբարոյական ընտանիքի մարդ են:

«Ծառուկյանը թույլ չի տա, որ ժողովրդի մատը փուշ մտնի: Ինչպես կարո՞ղ եմ ես այդպիսի բան արած լինել: Ովքեր տարածել են այդ տեղեկությունը, անբարոյական ընտանիքի մարդիկ են: Դա շանտաժ է Ծառուկյանի դեմ»,- նշեց Գագիկ Ծառուկյանը:

Tert.am-ի մեկ այլ հարցին, թե բացառո՞ւմ եք որևէ կերպ «Մարտի 1»-ին Ձեր առնչությունը, ԲՀԿ ղեկավարը պատասխանեց. «Եթե Ծառուկյանը կապ ունենա «Մարտի 1»-ի հետ, թող Ծառուկյանին մասսայական հրապարակում գնդակահարեն»:

Ինչ վերաբերում է ՀՀ 2-րդ նախագահ Ռոբերտ Քոչարյանի հետ համագործակցությանը, ով հայտարարել է քաղաքականություն վերադառնալու և արտահերթ խորհրդարանական ընտրություններին մասնակցելու մասին, Գագիկ Ծառուկյանը նշեց.

«Այս պահին Փաշինյանի հետ եմ համագործակցում: Ես այսօր իմ գործընկերների հետ եմ, մենք համագործակցում ենք, աշխատում ենք, մեր հարաբերությունները շատ լավ են, շատ ջերմ են: Մենք ուզում ենք մեր ծրագրերն իրականություն դարձնել: Մենք ուզում ենք մեր ժողովրդի սպասելիքը, այն, ինչի համար պայքարել ենք, իրականություն դարձնենք: Ես այն մարդը չեմ, ում հետ կարող է համագործակցության առաջարկ լինել»,- հայտարարեց նա:

«Մարտի 1»-ի գործի վերաբերյալ հարցերին Գ. Ծառուկյանը չպատասխանեց՝ նշելով, որ հարցն իրավական դաշտում է. «Ես այսօր իրավական հարցերին իրավունք չունեմ պատասխանելու»:

Tert.am