Նիկոլ Փաշինյանը պատասխանեց մի շարք օգտատերերի հարցերին ֆեյսբուքում՝ աղբահանությունից Երևանում մինչ Ամուլսար (տեսանյութ)

Նիկոլ Փաշինյանն անդրադարձել է Ամուլսարի հանքի շահագործման խնդրին: «Ֆեյսբուք»-ի ուղիղ եթերի ընթացքում ՀՀ վարչապետն ընդգծեց, որ բնապահպանական տեսչական մարմինը Ամուլսարում որոշակի ստուգումներ է իրականացրել, որոնց արդյունքները հնարավորություն են տալիս որոշակի միջանկյալ եզրակացությունների գալ: «Բայց վերջնական եզրակացության գալու համար մեզ հարկավոր է լինելու իրականացնել ևս մեկ միջազգային փորձաքննություն: Հիմա դուք տեղյակ եք, որ Ամուլսարի հետ կապված քրեական գործ է հարուցված քննչական կոմիտեում, և քննչական կոմիտեն հարուցված քրեական գործի շրջանակներում պիտի նշանակի փորձաքննություն: Շատ կարևոր է, որ այդ փորձաքննությունը իրականացվի միջազգային հեղինակավոր փորձագիտական կազմակերպության կողմից, որպեսզի այդ փորձաքննության արդյունքներն ընդունելի և անառարկելի լինեն ոչ միայն հայ հանրության, Հայաստանի կառավարության, այլ ընդհանրապես միջազգային հանրության կողմից, որովհետև սա չափազանց կարևոր հարց է»,- «Արմենպրես»-ի փոխանցմամբ՝ ընդգծեց Փաշինյանը:

Փաշինյանը նաեւ անրադարցավ այլ հարցերին նշելով, որ առաջիկայում կայցելի Մոսկվա, որտեղ հանդիպում կունենա Վլադիմիր Պուտինի հետ:

«Վերջին շրջանում շատ է խոսվում հայ-ռուսական հարաբերությունների մասին, բայց այսօրվա իրավիճակը համարում եմ աշխատանքային, որը բնականոն ընթանում է: Մենք շարունակում ենք շփումները տարբեր մակարդակներում: Առաջիկայում նախատեսված է իմ այցը Մոսկվա, որտեղ հանդիպում կունենամ Ռուսաստանի նախագահ Վլադիմիր Պուտինի հետ. դա կլինի մեր երրորդ հանդիպումը»,-ընդգծեց Փաշինյանը:

Նա համոզմունք հայտնեց, որ այդ հանդիպման ընթացքում երկկողմ հարաբերությունների օրակարգում առկա բազմաթիվ հարցեր մանրամասն կքննարկեն և լուծումներ կտան բազմաթիվ հարցերի: «Իհարկե, ես չեմ ցանկանում պնդել, որ բոլոր հնարավոր հարցերը կլուծենք, սակայն համոզված եմ, որ մեր հարաբերությունները բնականոն շարունակվում են և բնականոն կշարունակվեն»,-եզրափակեց վարչապետը: