Գարո Փայլանը թույլ չտվեց ձերբակալել Հրանտ Դինքի որդուն (տեսանյութ)

Ստամբուլում օգոստոսի 25-ին բողոքի ակցիայի ժամանակ հարձակման էր ենթարկվել Թուրքիայի քրդամետ ընդդիմադիր «Ժողովուրդների դեմոկրատական կուսակցության» (HDP-ԺԴԿ) հայազգի պատգամավոր Կարո Փայլանը:

Հայկական «Ակօս» պարբերականի փոխանցմամբ, Ստամբուլում «Շաբաթօրյա մայրերի» ակցիայի ժամանակ Կարո Փայլանը փորձել է թույլ չտալ Հրանտ Դինքի որդու  ձերբակալումը: Արդյունքում` Փայլանի ու նրա մի քանի կուսակիցների ջանքերի շնորհիվ ոստիկաններին չի հաջողվել բաժանմունք տանել Դինքին։

Ըստ պարբերականի, ոստիկանները ձերբակալել են ակցիայի 47 մասնակցի, որոնք այսօր արդեն ազատության մեջ են։

Նշվում է, որ «Շաբաթօրյա մայրերի» ակցիայի անցկացման համար կազմակերպիչները քաղաքապետարանից թույլտվություն չեն ունեցել, սակայն որոշել են իրականացնել նստացույցը։

«Շաբաթօրյա մայրերի» նախաձեռնությունը ներկայացնում է 1980 - 90 -ական թվականներին քրդական շարժման լարված ժամանակաշրջանում կալանավորված ու բանտերում անհայտ կորած կամ քաղաքական սպանությունների զոհ դարձած անձանց մայրերի բողոքի ակցիաներ, որոնք անցկացվում են 1995-ից ի վեր ամեն շաբաթ օր՝ Ստամբուլի Գալաթասարայի վարժարանի դիմաց։

Նախօրեին «Շաբաթօրյա մայրերի» 700-րդ ակցիան էր։

Տեսանյութը` Ira Tzourou-ի:

">