Դուք շքեղագույն հարսանիք արեք, զինվորը ձեզ համար կյանք զոհի՞

Այսօր քաղաքական էլիտան հարսանիքի է, էլի նմանը չունեցող, շքեղագույն հարսանիք է լինելու: Ասում են՝ ԱԺ ՀՀԿ–ական պատգամավոր Ալեքսան Պետրոսյանի որդին է ամուսնանում։ Հարսանիքին հրավիրված են նախարարներ, պատգամավորներ, գործարարներ՝ և, իհարկե, Սերժ Սարգսյանի գլխավորությամբ:

Այն ֆոնին, երբ մենք ամեն օր սահմանին զինվոր ենք կորցնում հենց այս քաղաքական էլիտայի վարած արտաքին քաղաքական անհաջող քայլերի «շնորհիվ»՝ հույսները դնելով զինվորի մարտունակ ու հայրենասեր լինելու վրա, նրանք գնում են քեֆերի՝ առանց մի կաթիլ խղճի խայթ զգալու:

Մենք ամեն վայրկյան պատերազմ սկսելու վտանգի առաջ ենք կանգնած, ամեն օր զինվոր ենք կորցնում, իսկ այն իշխանությունը, որը պարտավոր է քայլեր ձեռնարկել՝ պատերազմը կանխելու, զինվորի մահը չհանդուրժելու համար, գնում է քեֆերի, երբ որ պատահի:

Նրանց համար Հայրենիք, զինվոր, զինվորի մահ ասվածն ուղղակի եթերային հայտարարություններ անելու համար է, զգացական ոչինչ չկա, նրանց համար ոչինչ չարժե մեր հայրենիքի համար պայքարող զինվորի կյանքը: Նրանց համար արդեն սովորական է դարձել՝ սահմանին զինվոր մահանալու լուրը, քանի որ նրանք կարող են հարսանիք, քեֆ-ուրախություն անել այն ժամանակ, երբ երկիրը պատերազմական իրավիճակում է, երբ տուն չկա, որտեղ մայրը չողբա զոհված զինվորի համար, երբ ժողովուրդը փող է հավաքում՝ զինվորին օգնելու, անհրաժեշտ ամեն ինչ գնելու համար, իսկ քաղաքական էլիտան հազարավոր դոլլարներ է ծախսում իրենց մեկ օրվա քեֆերի, ճոխ հարսանիքների համար:

Դե չմոռանանք՝ Ապրիլյան քառօրյա պատերազմից մի քանի օր հետո Մոսկվայում տեղի ունեցավ անսահման շքեղ հարսանիք, որտեղ իրենց մասնակցությամբ էլ ավելի «ճողացրեցին» Սերժն ու իր մտերիմ մի քանի իշխանիկներ:

Սաթեն Մանասյանի ֆեյսբուքյան էջից