Կեղծ երկընտրանք է.Հայաստանին պետք է հանքարդյունաբերությո՞ւն, թե՞ IT

Հայաստանում վերջին իրադարձություններից հետո, ցավոք սրտի, շատ հարցերի վերաբերյալ հանրային կարծիքը հենվում է էմոցիայի, ագրեսիայի և ոչ ռացիոնալ մոտեցումների վրա: Եվ խոսքը ոչ միայն քաղաքական հարցերի մասին է:

Վառ օրինակ բերեմ: Ամուլսարի հանքի շահագործման հետ կապված ուղղորդված հակաքարոզչության ընթացքում մի կեղծ մոտեցում են ձևավորել, իբր Հայաստանին ոչ Ամուլսարն է պետք, ոչ էլ` հանքարդյունաբերությունը: Ու մենք եթե ուզում ենք զարգանալ, պետք է IT ոլորտը զարգացնենք: Սա կեղծ երկընտրանք է իրականում: Սա նման է 1990-ականների այն խոսակցություններին, որ մենք Ջերմուկով ու տուֆով կարող ենք երկիր պահել: Դրա համար պետք է փակել ատոմակայանը, Նաիրիտը.....Իրականում օրվա իշխանության գերնպատակներից մեկը պետք է լինի և՛ IT-ի զարգացումը, և՛ անվտանգ հանքարդյունաբերության զարգացումը, և՛ արտահանման խթանումը, և՛ գյուղատնտեսության զարգացումը:

Եթե զարգացնում ենք մի բանը, չի նշանակում,. որ պետք է խոչընդոտենք այլ ոլոտների զարգացմանը:

Կոնկրետ Ամուլսարի հետ կապված Կառավարությունն այսօր պետք է մաքսիմալ արագ որոշում կայացնի, և, հենվելով բաձարձակապես փորձագիտական եզրակացությունների վրա, թույլ տա հանքի լիակատար շահագործումը:

Իսկ հետագայի համար բոլոր կազմակերպությունների առջև, ովքեր Հայաստանում կցանկանան զբաղվել հանքարդյունաբերությամբ, դնի նույն պայմանները, որոնք դրել է «Լիդիան Արմենիայի» առջև (խոսքը վերաբերվում է հանքի շահագործման մաքսիմալ անվտանգ ուղիների մասին), և պետք չէ ոչ Ամուլսարը փակել, ոչ IT-ի գլխին քար գցել, ոչ էլ կեղծ օրակարգերով առաջնորդվել:

Փոքր, շրջափակման մեջ գտնվող երկիր ենք, պետք է հնարավորինս դիվերսիֆիկացված տնտեսություն կառուցենք, և մեր բոլոր ռեսուրսներից օգտվենք: Բնությունը մեզ ծով չի տվել, լեռ է տվել, եկեք դրանից զգուշությամբ, բայց օգտնվենք:

Սևակ Դանիելյանի ֆեյսբուքյան էջից