Իմ հրաժարականի հիմքում քաղաքականություն վերադառնալու Գագիկ Ծառուկյանի որոշումն էր. Իշխան Զաքարյան
Վերահսկիչ պալատի նախկին նախագահ Իշխան Զաքարյանը ԲՀԿ 9-րդ համագումարում ունեցած ելույթում ներկայացրեց պաշտոնից իր հրաժարականի պատճառը․
«Ես երկար տարիներ աշխատել եմ այդ բարձր պաշտոնում, իմ գործն արել եմ բարեխղճորեն եւ ինձ վստահված գործին վերաբերվել եմ մեծ պատասխանատվությամբ: Հրաժարականի դիմումն ինձ տրվել է հեշտությամբ, քանի որ իմ որոշման հիմքում Գագիկ Ծառուկյանի որոշումն էր՝ ակտիվորեն մասնակցել առաջիկա խորհրդարանական ընտրություններին: Որպես մարդ, ես պետք է լինեի իմ 20 տարվա ընկերոջ եւ կուսակցական ընկերոջ կողքին, այլ որոշում ուղղակի հնարավոր չէր»:
Իր ելույթում Իշխան Զաքարյանը նաև հայտարարել է, որ կուսակցությունը ձգտում է երկրում կարեւոր փոփոխությունների՝ երկիրն անվտանգ, քաղաքացիների կյանքը բարեկեցիկ դարձնելու ուղղությամբ:
«Մենք չենք ուզում եւ չենք քարոզելու ներքին թշնամանք, ներքին ատելություն: Լրիվ հակառակը՝ մենք կոչ ենք անելու բոլորին խելք-խելքի տալ ու միասին գտնել լուծումներ: Այս ամենով հանդերձ, սա նոր էջ է բոլորիս համար: Նոր է, որովհետեւ մեր երկրի ու ժողովրդի առաջ ծառացել են նոր մարտահրավերներ ու նոր խնդիրներ, սահմաններում անկայուն է եւ խիստ մտահոգիչ է տնտեսության վիճակը»,- ասել է ՎՊ նախկին նախագահը։
Իշխան Զաքարյանն անդրադարձել է նաև հասարակության կողմից գալիք ընտրությունների թյուր ընկալմանը․ նրա խոսքով ընտրողների մեծ մասը կամ չի գիտակցում կամ թույլ է գիտակցում, որ այլեւս նախագահական ընտրություններ չեն լինելու եւ միայն խորհրդարանական ընտրություններով է իշխանությունը ձեւավորվելու:
«Ես կոչ եմ անում այսօրվանից սկսած այս միտքը, այս իրողությունը հասանելի դարձնել մեր քաղաքացիներին: Հավատացեք, սա ամենակարեւոր քայլն է՝ վերջնական հաջողության հասնելու ճանապարհին: Մարդիկ պետք է գիտակցեն, որ սա կարեւորագույն ընտրություն է եւ իրենց քվեից է կախված հաջորդ իշխանության որակը, հետեւաբար՝ նաեւ իրենց բարեկեցությունը»,- ասել է նա։
Zham.am