Ռոբերտ Քոչարյանի խափանման միջոցը փոխվեց. նա ազատ է արձակվել. Տեսանյութ

Վերաքննիչ դատարանի որոշմամբ քիչ առաջ ազատ արձակվեց ՀՀ երկրորդ նախագահ Ռոբերտ Քոչարյանը: Ալեքսանդր Ազարյանի նախագահությամբ դատարանը բավարարեց Ռոբերտ Քոչարյանի պաշտպանների բողոքը:

Խափանման միջոցի փոփոխման հիմք է հանդիսացել նրա՝ օրենքով անձեռնմխելի լինելու փաստը:

«Դատարանը հրապարակեց որոշման եզրափակիչ մասը և հայտարարեց, որ բավարարում է պաշտպանների բողոքը, վերացնում է առաջին ատյանի դատարանի որոշումը, հաշվի առնելով, որ Ռոբերտ Քոչարյանն անձեռնմխելի է՝ օգտվում է անձեռնմխելիության իրավունքից», - ասաց լրագրողների հետ զրույցում Երկրորդ նախագահի պաշտպան Ռուբեն Սահակյանը:

Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել վկայի կարգավիճակով՝ հարցաքննության։ Նույն օրը 2008 թվականի մարտի 1-ից 2-ն ընկած ժամանակահատվածում Երևանում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռքբերված ապացույցների բավարար համակցության հիման վրա 2018 թվականի հուլիսի 26-ին ՀՀ պաշտոնաթող նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։