Օգոստոսի 17-ին բոլորիդ հրավիրում եմ Հանրապետության հրապարակ՝ չափազանց կարևոր խոսակցություն ունենալու. Փաշինյան

Նիկոլ Փաշինյանը ֆեյսբուքյան ուղիղ եթերում հայտարարեց օգոստոսի 17-ին կայանալիք մեծ հանրահավաքի մասին:

Փաշինյանը նշեց, որ լրանում է իր վարչապետության 100 օրը, ինչի համար էլ ինքն առաջարկում է օգոստոսի 17-ին, ժամը 18:30-ին Հանրապետության հրապարակում մեծ հանրահավաք հրավիրել, որի ընթացքում նախ հանդիպել, քանի որ ինքը շատ է կարոտել քաղաքացիներին և ուզում է նորից շփվելու հնարավորություն ունենալ. «Երկրորդը՝ կարծում եմ, որ պետք է կարևոր խոսակցություն ունենալ այն մասին, թե ՀՀ-ում ինչ է տեղի ունեցել վերջին 100 օրում և ինչ է տեղի ունենալու հետո, ինչ քայլեր է ձեռնարկել կառավարությունը Հայաստանում թռիչքաձև զարգացում ապահովելու համար և կոնկրետ ինչ քայլերով ենք մենք պատրաստվում առաջիկայում այդ զարգացումն ապահովել, ինչ հնարավորություններ, մարտահրավերներ կան և ինչպես ենք մենք կարողանալու այդ բոլոր հնարավորություններն օգտագործել, մարտահրավերները կառավարել»:

Փաշինյանի խոսքերով, դա շատ կարևոր իրադարձություն է և պարզից էլ պարզ, որ յուրաքանչյուրի մասնակցությունը կարևոր է ապագայի կայուն հիմքերը դնելու և արդեն գործնականում Հայաստանի զարգացման մեկնարկը տալու համար և այն խնդիրների մասին խոսելու համար, որոնց հետ բախվել են ՀՀ իշխանությունները. «Ուրախ եմ, որ կրկին ձեզ հետ շփվելու առիթն ունեմ ու ունենալու եմ Երևանի Հանրապետոթյան հրապարակում, որտեղ մենք միասին իրականացրեցինք սիրո և համերաշխության հեղափոխությունը: Եվ ուրեմն օգոստոսի 17-ին, ժամը 18:30-ին բոլորիդ հրավիրում եմ Հանրապետության հրապարակ չափազանց կարևոր խոսակցություն ունենալու:

Ֆորմալ առիթն իմ վարչապետության 100 օրն է, իսկ ընդհանուր առմամբ մենք խոսելու ենք մեր երկրի այսօրվա և ապագայի մասին, որը լինելու է փառավոր և հաղթական»: