Սա անձնական և քաղաքական հաշվեհարդար է. Վիկտոր Սողոմոնյանը Ռոբերտ Քոչարյանի կալանավորման մասին (տեսանյութ)
Այսօր հրավիրված մամուլի ասուլիսին Հայաստանի երկրորդ նախագահի գրասենյակի ղեկավար Վիկտոր Սողոմոնյանը հայտարարեց, որ Ռոբերտ Քոչարյանին առաջադրված մեղադրանքները և կալանավորումը՝ ապօրինի են և բացահայտ քաղաքական ու անձնական հետապնդում է:
-Երեկ որոշում է կայացվել ՀՀ երկրորդ նախագահ Ռոբերտ Քոչարյանին կալանավորելու վերաբերյալ: Պետք է հայտարարեմ, որ գործը և կալանավորումը, բացարձակապես ապօրինի են: Սա ակնհայտ քաղաքական և անձնական հետապնդում է: Սա այն է, ինչը կոչվում է վերջերս մոդայիկ դարձած բառով՝ վենդետա: Սա անձնական և քաղաքական հաշվեհարդար է, որը չի տեղավորվում որևէ իրավական դաշտում, և որևէ իրավական հիմնավորում չունի, - ասաց Վիկտոր Սողոմոնյանը:
Հայաստանի երկրորդ նախագահի գրասենյակի ղեկավարը նաև հավելեց, որ Ռոբերտ Քոչարյանի դեմ հարուցված քրեական գործը, որը "սարքվել է" նրա դեմ՝ ապօրինի է և կապ չունի ՀՀ օրենքների հետ և ոտնահարում է պետության Սահմանադրությունը:
- Մենք պահանջել ենք և պահանջում ենք անհապաղ ազատ արձակել նրան, փոխել խափանման միջոցը և ընդհանրապես բողոքարկելու ենք հարուցված քրեական գործերը, - ասաց Վիկտոր Սողոմոնյանը:
Zham.am