Հեշտացված օրվա կարգացուցակով ծառայողները վեց ամիսը մեկ փորձաքննության են ենթարկվելու առաջացող խնդիրները լուծելու նպատակով

Զինված ուժերի ռազմաբժշկական վարչության և անձնակազմի հետ տարվող աշխատանքի վարչությունների կարևոր առաքելությունն է լինելու այն փոփոխությունների դիտարկումը, որոնցով նախկինում տարկետում ստացող զորակոչիկներն այժմ հայտնվում են ծառայության մեջ: «Արմենպրես»-ի փոխանցմամբ՝ լրագրողների հետ ճեպազրույցում նման տեսակետ արտահայտեց ՀՀ պաշտպանության նախարարին կից Հասարակական խորհրդի համակարգող Գեղամ Հարությունյանը: Նրա խոսքով՝ այս իրողությունը պայմանավորված է նաև ապրիլին, կառավարությամբ որոշմամբ, մի քանի հիվանդությունների փորձաքննության չափանիշների մեջ կատարված փոփոխություններով, համաձայն որոնց, եթե նախկինում տրվում էր տարկետում, ապա ներկայում այդ հիվանդություններով տղաները զորակոչվում են բանակ:

«Իհարկե, դա ենթադրում է ծառայության ընթացքում համապատասխան պայմանների ստեղծում, դրա համար այս զինակոչի նորություններից մեկն էլ այն է, որ սահմանվել է ծառայություն՝ հեշտացված օրվա կարգացուցակով: Նրանք պարապմունքների ավելի ցածր ծանրաբեռնվածություն են ունենալու, հանգստի երկար ժամանակ, իհարկե, կարող են ընդգրկվել պահակային ծառայության մեջ, բայց դա չշփոթել դիրքերում ծառայության հետ: Բացի այդ՝ վեց ամիսը մեկ ծառայության ընթացքում փորձաքննություն է իրականացվելու՝ պարզելու նրանց առողջական վիճակում տեղի ունեցած տեղաշարժերը»,-ասաց Գեղամ Հարությունյանը:

ՊՆ պաշտոնյայի դիտարկմամբ՝ գնահատվելու, թե այդ հիվանդությունները կրող զինծառայողները որքանով են հարմարվել ծառայությանը, ինչպիսին է նրանց բարոյահոգեբանական վիճակը:

«Եթե բացահայտվեն խնդիրներ, որոնք անհամատեղելի կլինեն այս փոփոխությունների հետ, կարծում եմ՝ պետք է մտածել ինչ-որ փոփոխություններ կատարելու մասին: Բանակը դինամիկ փոփոխությունների մեջ է, այն մշտապես արձագանքում է ժամանակի պահանջներին ու ծառացող խնդիրներին»,-վստահեցրեց Հասարակական խորհրդի համակարգողը:

Գեղամ Հարությունյանը դժվարացավ նշեց, թե հեշտացված օրվա կարգացուցակով քանի նորակոչիկ է զորակոչվել բանակ՝ հույս հայտնելով, որ այդ տվյալները պարզ կդառնան ամառային զորակոչի ավարտից հետո:

Նա նկատեց, որ այս փոփոխությունները հարուցել են մի խումբ ծնողների ու զինակոչիկների բողոքը և Հասարակական խորհրդի ներքո գործող Քաղաքացիների դիմումների և բողոքների քննարկման հանձնաժողովը ամառային զորակոչի օրերին ստացել է դիմումներ հենց այս առնչությամբ:

Մանրամասները՝ «Արմենպրես» կայքում