Երեխան ի վիճակի չէ վազել ու ժիմ անել, ամեն օր վատանում է. ահազանգ նորակոչիկի ընտանիքից

Շիրակի մարզի Անուշավան համայնքի բնակիչ Նորայր Հարթենյանն ահազանգել է «Հայկական ժամանակի» խմբագրություն եւ տեղեկացրել, որ եղբորորդուն առողջական խնդիրներով զորակոչել են պարտադիր ծառայության: Նրա փոխանցմամբ՝ եղբոր որդին՝ Ա. Հ.-ն, 2018 թվականի հուլիսի 10-ին մեկնել է պարտադիր ծառայության՝ Ասկերանում: Սակայն Նորայր Հարթենյանը պնդում է, որ եղբորորդու առողջական խնդիրները չեն լուծվել եւ նա դրանց պատճառով պարտադիր զինվորական ծառայության է մեկնել երկու տարի ուշ:

ՀԺ-ի հետ զրույցում Նորայր Հարթենյանը փոխանցեց, որ այս ընթացքում եղբորորդին հասցրել է վատանալ: Նրան կարճ ժամանակով տեղափոխել են հոսպիտալ եւ ծնողներին հրավիրել են զորամաս:

«Խնդիրներ ունի, որի պատճառով տարել են հոսպիտալ, ծնողներին հրավիրել են զորամաս: Երեխան ամեն օր ուշագնաց է լինում, վիճակը լավ չէ: Սրտի առիթմիա ունենալու պատճառով մեկ տարի հետաձգվել է ծառայությունը: Նա ունի երիկամների տեղաշարժ: Երեխան ի ծնե խնդիրներ ունի: Իր մոտ ագրեսիվություն է նկատվում: Գնալու օրվա հաջորդ օրվանից վազացրել են, նա էլ սրտի խնդիր ունի: Երեխան վատացել է, հրամանատարը զանգել է ինձ: Ծնողները գնացել են՝ զորամասում ասել եմ, որ այս երեխան խնդիրներ ունի, ինչո՞ւ են ուղարկել բանակ: Երեխան ի վիճակի չէ վազել ու ժիմ անել, նա 1,5 կգ է ծնվել: Նա նաեւ հոգեբանական շեղվածություն ունի»,- մեր զրույցում ասաց զինվորի հորեղբայրը:

Այժմ նրանք նոր փորձաքննություն են պահանջում: Կասկածներ ունեն, որ տղային դիտավորյալ են ուղարկել ծառայության:

Ի դեպ, նշենք, որ 2016 թվականին Նորայր Հարթենյանը բողոքով դիմել է ՀՀ զինվորական կոմիսար Հենրիկ Մուրադյանին, որպեսզի եւս մեկ անգամ եղբորորդուն պատշաճ հետազոտեն: Արդյունքում Ա. Հ.-ին տրվել է տարկետում 10 ամիս ժամկետով: Վերջինիս մոտ այդ շրջանում ախտորոշվել է «Թոքային զարկերակի փականի ռեգուրգիտացիա 1-ից 2-րդ աստիճանի Սինուսային տախիկարդիա», արձանագրվել է միտարալ փականի հետհոսք եւ թոքային զարկերակի հետհոսք՝ առաջին աստիճանի: ՊՆ 410 հրամանի 26դ հոդվածով ճանաչվել է զինծառայությանը պիտանի՝ սահմանափակումներով:

Արթիկի զինկոմիսարիատի բժշկական հանձնաժողովի 2016 թվականի եզրակացության համաձայն էլ այս երիտասարդը ծառայությանը պիտանի է ճանաչվել ՊՆ 410 հրամանի 26, 28 հոդվածների համաձայն, այսինքն՝ սահմանափակումներով:

Նշենք, որ սահմանափակումների մեջ է մտնում ֆիզպատրաստությունից եւ մարտական հերթապահությունից ազատվելը: Սակայն, ինչպես Նորայր Հարթենյանն է պնդում, եղբորորդու վրա այս սահմանափակումները չեն տարածվում:

Պաշտպանության նախարարի մամուլի խոսնակ Արծրուն Հովհաննիսյանը թեմայի շուրջ ՀԺ-ի հետ զրույցում ասաց, որ հարազատները պետք է դիմեն ՊՆ թեժ գծին: (1-88 անվճար):

Աղբյուրը՝ Armtimes.com