Տեխնիկապես հնարավոր չէ, որ ընտրությունները լինեն այս տարի. ՀՀԿ խմբակցության ղեկավար

Ընտրությունների հարցում շտապողականությունը կարող է խանգարել միջազգային մեր իմիջին: Այս մասին, այսօր՝ հունիսի 21-ին, ԱԺ-ում լրագրողների հետ զրույցում նշել է ՀՀԿ խմբակցության ղեկավար Վահրամ Բաղդասարյանը՝ անդրադռանալով արտահերթ խորհրդարանական ընտրությունների անցկացման ժամկետներին: Այս մասին հայտնում է NEWS.am-ը:

«Հնչում են կարծիքներ, որ մեզ պետք չի Վենետիկի հանձնաժողովի կարծիքը: Բայց դրանով մենք 25 տարիների աշխատանքը ջուրը կգցենք: Ամեն ինչ կախված կլինի քննարկումներից, կոնսենսուսից: Ինձ թվում է կլինի այդ կոնսեսուսը»,-ասաց նա՝ հավելելով, որ տեխնիկապես հնարավոր չի համարում, որ ընտրությունները լինեն այս տարի:

«Վենետիկի հանձնաժողովը հետաքրքիր բան է առաջարկել, որ ընտրական օրենսգիրքը ընդունվելուց հետո մեկ տարի ժամանակ է պետք, որ քաղաքական ուժերը նախապատրաստվեն: Եթե թույլ չտան ուժերին նախապատրաստվել, դա կարող է վնասել մեր հեղինակությանը»,-ասաց Վահրամ Բաղդասարյանը: