Անդրանիկ Թևանյան. «Կոչ եմ անում տուն ուղարկել գործող իշխանությանը»
ՀԱՄԱԽՄԲՈւՄ կուսակցության քաղաքական խորհրդի համակարգող Անդրանիկ Թևանյանի ելույթը կուսակցության երիտասարդական միության հիմնադիր համագումարում:
Ցանկանում եմ շնորհավորել բոլորիս ՀԱՄԱԽՄԲՈւՄ կուսակցության երիտասարդական միության կազմավորման առիթով: Շնորհավորում եմ ղեկավար կազմին, շնորհավորում եմ խորհրդի անդամներին և կոչ անում, որ դահլիճային հանդիպումից հետո բոլորս անցնենք մեր ծանր աշխատանքին: Առջևում ընտրություններն են, և այս ընտրությունները շատ բախտորոշ և ճակատագրական նշանակություն են ունենալու Հայաստանի համար, քանի որ փոխվել է համակարգը, և փոխվել են նաև մոտեցումները:
Իշխանությունները՝ Հանրապետական կուսակցության ու նրա ղեկավարի գլխավորությամբ, նպատակ են դրել վերարտադրվել, իսկ դա նշանակում է, որ նպատակ ունեն վերարտադրվել բոլոր այն արատները, բոլոր այն թերությունները, որոնք Հայաստանին հասցրել են այս վիճակին:
ՀՀ իշխանությունը արտաքին և ներքին քաղաքական ոլորտներում տապալվել է, և այդ տապալման վերջին ցայտուն օրինակներից մեկը Ալեքսանդր Լապշինի հետ կատարվածն է: Դա ցույց է տալիս, որ ոչ միայն պետությունը գոյություն չունի որպես այդպիսին, և պետությունն իր իշխանության դեմքով չի կարողանում պաշտպանել իր շահերը, այլ ընդհանրապես միջազգային հարաբերություններում մենք սուբյեկտից վերածվել ենք օբյեկտի, այնպիսի օբյեկտի, որի հետ որևէ մեկը հաշվի չի նստում: Իշխանությունը քնով էր անցել Սաֆարովի գործի հետ կապված, իշխանությունը քնով էր անցել և բերանը ջուր էր առել, երբ Նազարբաևը Ադրբեջանի շահերն էր պաշտպանում: Իշխանությունը քնած էր մնացել ապրիլյան պատերազմի ժամանակ: Իշխանությունը հիմա էլ է քնած, երբ Լապշինի հետ կապված՝ մենք հարվածներ ենք ստանում: Սա մեկ անձին վերաբերող արտահանձնման հետ չի կապված, այլ ուղղակիորեն առնչվում է Հայաստանի Հանրապետության շահերին:
Այս ամենը հաշվի առնելով և հաշվի առնելով այն հանգամանքը, որ Հանրապետական մենատիրութունը (խոսքը կուսակցության մասին է) և ՀՀ քաղաքացիներին ու առաջին հերթին երիտասարդությանը առաջարկում է կա՛մ փոխել իր տեսակը՝ ձեռքը առնել օճառը և ինտեգրվել իշխող ուժին, և բացարձակապես պրոֆեսիոնալ կամ այլ մարդկային որակների հետ կապված չլինել ու այլ որակներով հասնել հաջողության, կա՛մ արտագաղթել:
Կա նաև երրորդ տարբերակ, որը մենք ենք առաջարկում՝ պայքարի տարբերակն է, որը հնարավորություն կտա փոխել իրավիճակը Հայաստանում կամ այն մթնոլորտը, որը դասականը ձևակերպեց որպես գաղջ:
ՀԱՄԱԽՄԲՈւՄ կուսակցությունն առաջարկում է բոլոր քաղաքական ուժերին, բացի ՀՀԿ-ից, մեկ ուղղությամբ թիրախավորել իրենց հարվածները գործող իշխանությանը: Որքան ներքին գզվռտոցներ լինեն, որքան փոխադարձ հարձակումներ լինեն, դրանից մենք չենք շահելու: Անկախ նրանից, թե քաղաքական ուժերը քանի շարասյունով կշարժվեն դեպի Ազգային ժողով՝ մենք պետք է բոլոր շարասյուների հարվածային ուղղությունները մեկ ուղղությամբ տանենք՝ գործող իշխանութունների:
Եւս մեկ անգամ շնորհավորելով բոլորիս միության ձևավորման կապակցությամբ՝ կոչ եմ անում ոչ միայն մեր կուսակիցներին, այլ նաև Հայաստանի Հանրապետության ապագայով մտահոգ բոլոր քաղաքացիներին ակտիվորեն մասնակցել քաղաքական գործընթացներին և տուն ուղարկել գործող իշխանությանը, որը տապալվել է բոլոր ուղղություններով:
Բոլորիս աշխատանք, հաջողություն և հաղթանակ եմ մաղթում:
Շնորհակալություն