Դատարանը թույլատրեց գրավի դիմաց կալանքից ազատել ՊՊԾ գնդի գործով ամբաստանյալ Արամ Հակոբյանին (Տեսանյութ)

ՊՊԾ գնդի գործով ամբաստանյալ Արամ Հակոբյանն ազատ արձակվեց կալանքից: Դատավոր Արշակ Վարդանյանը բավարարեց պաշտպան Տիգրան Եգորյանի միջնորդությունը, հայտնում է Tert.am-ը:

Երևանի ընդհանուր իրավասության առաջին ատյանի դատարանում շարունակվում է ՊՊԾ գունդը զավթելու և մի շարք ծանր հանցագործություններ կատարելու մեջ մեղադրվողներ՝ Արամ Մանուկյանի, Հովհաննես Հարությունյանի, Թաթուլ Թամրազյանի, Արամ Հակոբյանի, Տիգրան Մանուկյանի, Վարդան Գերավետյանի, Մարտիրոս Հակոբյանի, Արայիկ Հակոբյանի, Գևորգ Իրիցյանի, Սերգեյ Կյուրեղյանի և Թորոս Թորոսյանի գործով նիստը՝ դատավոր Արշակ Վարդանյանի նախագահությամբ։

Դատական նիստի մեկնարկին պաշտպան Տիգրան Եգորյանը միջնորդել էր փոխել ամբաստանյալ Արամ Հակոբյանի խափանման միջոց կալանքը։

Մեղադրող Հակոբ Ենոքյանն ասել էր, որ առարկում են խափանման միջոցը փոխելուն, իսկ գրավով փոխարինելուն չենք առարկում:

Դատավորը գնաց խորհրդակցական սենյակ՝ խափանման միջոցը փոխելու վերաբերյալ որոշում կայացնելու: Խորհրդակցական սենյակից վերադառնալուց հետո դատավոր Արշակ Վարդանյանը բավարարեց միջնորդությունը և կալանքից ազատեց Արամ Հակոբյանին: Նրա նկատմամբ խափանման միջոց ընտրվեց 500 հզր դրամի չափով գրավը:

Նշենք, որ Արամ Հակոբյանը մեղադրվում է ՀՀ ՔՕ-ի 235-րդ հոդվածի 3-րդ մասի, 219-րդ հոդվածի 3-րդ մասի 1-ին կետի, 218-րդ հոդվածի 3-րդ մասի 1-ին կետի հատկանիշներով: