Հնարավոր է, անապահով ընտանիքներին տրամադրվող էլեկտրաէներգիայի սակագինը 10 դրամով իջեցնելու որոշումը կիրառվի հուլիսի 1-ի (Տեսանյութ)

«Եթե վերջնական որոշում կայացվի, հնարավոր կլինի հենց հուլիսի 1-ից 10 դրամի չափով նվազեցնել անապահով ընտանիքներին տրամադրվող էլեկտրաէներգիայի սակագինը», կառավարության նիստից հետո լրագրողների հետ զրույցում ասաց Էներգետիկայի և բնական պաշարների նախարար Արթուր Գրիգորյանը:

Հիշեցնենք, որ այսօր կառավարության նիստի ժամանակ նախարարը նշել էր, որ ուսումնասիրությունների արդյունքում իրենք եկել են եզրահանգման, որ կա հնարավորություն 10 դրամի չափով նվազեցնել անապահով ընտանիքներին տրամադրվող էլեկտրաէներգիայի սակագինը:

Նրա խոսքով՝ տարեվերջին կգնահատեն էներգետիկ համակարգի հնարավորությունները, ուստի հաշվի առնելով այս բոլոր ռիսկերը, գտնում են, որ կարող են սակագների հետ կապված փոփոխություններ իրականացնել անապահով ընտանիքների մասով, որոնց թիվը 110-120 հազար է:

«Մեր հաշվարկներով եկել ենք եզրահանգման, որ ունենք հնարավորություն 10 դրամի չափով նվազեցնել անապահով ընտանիքներին տրվող էրելտրաէներգիայի սակագինը: Մենք ունենք երկու տարբերակ, առաջին՝ սակագնի նվազումը իրականացնենք ՀԾԿՀ-ի հետ միասին, երկրորդ՝ բանակցությունների արդյունքում ՀԷՑ-ի սեփականատեր «Տաշիր» ընկերության հետ պայմանավորվածություն է ձեռք բերվել, որ իրենք իրենց շահույթի հաշվին նվազեցնեն 10 դրամի չափով: Եթե երկրորդ տարբերակն ենք անում, հարկերը չեն նվազում»,-ասաց Արթուր Գրիգորյանը:

Վարչապետ Նիկոլ Փաշինյանն արձագանքեց. «Այնքան ռիսկերի մասին խոսեցիք, բայց չասացիք, կոռուպցիոն ռիսկեր այդ ոլորտում ունե՞նք, թե չունենք, չարաշահումների ռիսկեր ունե՞նք, թե չունենք: Ես առաջարկում եմ, որ դուք շարունակեք ուսումնասիրությունը, առաջիկայում զեկուցեք: Այդ քննարկումները պետք է շարունակվեն, որ մենք համոզվենք՝ այդտեղ ամեն ինչ ճիշտ է և արդյունավետ: Հիմա պայմանավորվում ենք, որ անապահով ընտանիքների համար սակագինն իջնելու է, մնացածի մասով քննարկումները շարունակվելու են: Եզրակացությունները պետք է լինեն համոզիչ և թափանցիկ»:

Մանրամասները՝ Zham.am-ի տեսանյութում:

Zham.am