«Սուս-փուս նստենք տենանք ինչ ա լինում» արտաքին կողմնորոշման դոկտրի՞նն եք ընտրողի դատին ներկայացնելու

Էն մի հատ՝ ոչ բարով Ազգային Ժողովի փոխնախագահ ունենք, որ ասում էր, թե գալիք խորհրդարանական ընտրություններում որոշիչ դեր է ունենալու կուսակցությունների դիրքորոշումը Հայաստանի Հանրապետության արտաքին կողմնորոշման ու Լեռնային Ղարաբաղի հակամարտության կարգավորման շուրջ։ Նորին չանդրադառնամ այս մտքի աբսուրդայնությանը և նրան, որ աղքատ ժողովրդին դա իրականում քիչ է հետաքրքրում։ Բայց մարդը, որ բարձր պետական պաշտոն է զբաղեցնում, նաև իշխող կուսակցության փոխնախագահ է, դիրքորոշում է հայտնել։

Հիմա նայում ենք բլոգեր Լապշինի հետ կապված զարգացումները և Հայաստանի Հանրապետության արձագանքը, այսինքն արձագանքի բացակայությունը։ Մի Վահրամ Բաղդասարյան էր, որ ազգային-ազատագրական ոգով տոգորված՝ հայտարարեց, թե պետք է պահանջենք, որ Բելառուսին հեռացնեն ՀԱՊԿ-ից։ Էհ,ասենք, հեռացրեցին, հետո՞։

Ուրեմն էսօր ադրբեջանական կայքերից մեկում հարցազրույց եմ կարդում ԵԽԽՎ փոխնախագահի հետ, ով ոչ միայն արդարացնում է Բելառուսի քայլը և Ղարաբաղը օկուպացված տարածք անվանում, այլ նաև կոչ է անում եվրոպական երկրներին հետևել Բելառուսի օրինակին։ Ոչ, ԵԽԽՎ փոխնախագահը ադրբեջանցի չէ․ Գեորգի Լոգվինսկին ուկրաինացի է։ Հիմա մենք մեկ այլ՝ ոչ բարով Ազգային Ժողովի փոխնախագահ ունենք, ով նաև ԵԽԽՎ հայաստանյան պատվիրակության ղեկավարն է։ Ինչո՞վ է զբաղված։ Ղարաբաղը Ադրբեջանին մաս-մաս հանձնելու ՀՀԿ նախագահի ծրագրի համար արդարացումնե՞ր է մտածում։

Բա մեր ԱԳ նախարարությունն ինչո՞վ է զբաղված, ԱԳ նախարարն ու՞ր է։ Չլինի իրան էլ են կցել ՀՀԿ-ի ինչ-որ տարածքային կառույցի ու ձեն հավաքելով է զբաղված։ Այսպիսի դիվանագիտական անգրագիտությունը ոչ միայն խայտառակություն է, այլ նաև շատ վտանգավոր։

Հիմա վերադարնանք մեր վունդերկինդ Շարմազանովի հայտարարությանը․ սա՞ է ձեր պատկերացրած՝ Հայաստանի արտաքին կողմնորոշումը։ Սրանո՞վ եք ընտրողին ներկայանալու։ «Սուս-փուս նստենք տենանք ինչա լինում» արտաքին կողմնորոշման դոկտրինն եք ընտրողի դատին ներկայացնելու։ Սուս-փուս նստեցիք, որ Հայաստանը դարձավ Ռուսաստանի վրա ազդելու օբյեկտ, որ Ուկրաինան, Բելառուսը, Ղազախստանը Ռուսաստանին ինչ-որ բան ապացուցելու համար փորձում են Հայաստանին վնասել։ Բա հետո՞։

Այն ինչ այսօր կատարվում է Հայաստանի իշխանությունների անողնաշարության արդյունքն է։ Այն ցնդաբանությունների մասին, թե իբր այս ամենը կխթանի տուրիզմը Ղարաբաղում էլ չխոսամ, թե չէ հերթական անգամ ստիպված եմ լինելու մեր երկրի ղեկավարության ադեկվատությունն ու հոգեկան առողջությունը կասկածի տակ դնել։

Հրանտ Ենոքյանի ֆեյսբուքյան էջից