Նիկոլ Փաշինյանը մարտահրավերի ձեռնո՞ց է նետում Գագիկ Ծառուկյանին. Տեսանյութ

Այն, որ ապագա արտահերթ խորհրդարանական ընտրությունների դիտակետից Նիկոլ Փաշինյանի գլխավոր մրցակիցը լինելու է Ծառուկյանի թիմը, կանխատեսում են շատերը, թեև վաղ է այս շարքից դուրս գրել ՀՀԿ-ին, որն ինչպես հայտնի է, մոտ 20 տարի իշխող կուսակցություն է եղել և իրենով է ցեմենտել ողջ պետական կառավարման համակարգը: Սակայն շատերի համոզմամբ եթե ՀՀԿ-ն կազմաքանդվի, ապա նրանց բեկորների մեծ մասը կարող է հայտնվել Ծառուկյանի ազդեցության տակ: 

Հավանաբար դրանից մտահոգված են Նիկոլ Փաշինյանը և նրա թիմակիցները, սակայն դրա մասին բացահայտ այսօր ոչ ոք չի խոսում, քանզի Ծառուկյանի խմբակցությունը այսօր անհրաժեշտ է Փաշինյանի իշխանության համար՝ Ազգային ժողովում: Սակայն Փաշինյանի մտահոգության ազդակները երևում են արդեն այսօր և մասնավորապես՝ մարզպետերի նշանակմամբ: Հավելենք, որ 10 մարզպետերից 8-ի անուններն արդեն հայտնի են, սակայն նրանցից ոչ ոք Ծառուկյանի թիմից չէ, ինչը նշանակում է, որ այս հարցում առաջացել է լուրջ տարաձայնություն՝ Ծառուկյանի և Փաշինյանի միջև: 

Հատկանշական է նաև այն, որ Կոտայքի մարզպետի պաշտոնում նշանակվել է ոչ թե Ծառուկյանի մարդը, այլ հենց Փաշինյանի թիմի ներկայացուցիչը՝ Ռոմանոս Պետրոսյանը, ով իր առաջին հարցազրույցում իր գլխավոր առաքելությունը համարել է՝ «Կոտայքի մարզի բնակչին դարձնել Հայաստանի իրավատեր քաղաքացի»: Սա թերևս այն գլխավոր մեսիջն է, որից պարզ երևում է, որ ներկայիս իշխանությունները փորձելու են հնարավորինս զերծ պահել Ծառուկյանի թիմակիցներին՝ պետական կառավարման համակարգից, ինչը նշանակում է, որ Փաշինյանը և նրա կողմնակիցները արդեն իսկ իրենց համար գալիք ընտրություններում որպես գլխավոր մրցակից թիրախավորել են ոչ միայն ՀՀԿ-ին, այլև՝ Ծառուկյան դաշինքին:

Արտակ Հակոբյան