Երևանի քաղաքապետարանն անհանգստություն չունի ԱԾ-ի ստուգումների վերաբերյալ (Տեսանյութ)

Լրագրողներն այսօր Երևանի փոխքաղաքապետ Կամո Արեյանից հետաքրքրվեցին՝ մտավախություն չունի՞, որ ԱԱԾ-ն ստուգումների ալիքը կհասնի նաև Երևանի քաղաքապետարան, որի անարդյունավետ ծախսերի մասին տարիներ շարունակ խոսվել է: Վերջինս չհամաձայնեց անարդյունավետ ծախսերի մասին տեսակետի հետ:

«Այդ ծախսերը ներառված են եղել համայնքային բյուջեում, բյուջեն անցել է թափանցիկ քննարկումների ընթացակարգ, անցել է ավագանու նիստով: Ձեր հարցին, թե՝ չունե՞ք մտահոգություն, ԱԱԾ-ն, որպես Ազգային անվտանգության ծառայության մարմին, իրավունք ունի իրականացնելու այդ ուսումնասիրությունները: Ըստ արդյունքների էլ կերևա՝ կան մտահոգիչ խնդիրներ, թե՞ ոչ: Այս պահին դրությամբ Երևանի քաղաքապետարանի ուղղությամբ մեզ հայտնված չէ նման ուսումնասիրություններ կատարելու մասին» ,- ասաց Արեյանը:

Երևանի փոխքաղաքապետը նաև համոզմունք հայտնեց, որ ինքը և քաղաքապետ Տարոն Մարգարյանը համապատասխանում են նոր Հայաստանի չափորոշիչերին:

«ԱԱԾ-ի իրավունքն ունի կատարելու ուսումնասիրություններ: Նախապես հանգստանալու ու անհանգստանալու մասին մտքերն ինձ համար անտրամաբանական են», – նշեց նա:

Մանրամասները՝ Zham.am-ի տեսանյութում:

Zham.am