Հայաստան-ԵՄ համաձայնագրի շրջանակում ԵՄ-ն 4 տարվա ընթացքում Հայաստանին կհատկացնի 176 մլն եվրո, իսկ այս տարի՝ 36 մլն եվրո (Տեսանյութ)

Հունիսի 1-ից Հայաստան-ԵՄ համապարփակ և ընդլայնված համաձայնագրի շուրջ 80 տոկոսը մտնելու է ուժի մեջ, այսօր ԱԺ-ում լրագրողների հետ ճեպազրույցում հայտարարեց ՀՀ ԱԳ փոխնախարար Արմեն Պապիկյանը։

«Ակնկալել, որ հունիսի 2-ին մեր կյանքում մի բան կփոխվի, դա առնվազն միամտություն է։ Դա գործընթաց է, որ պետք է շարունակվի։ Ես հույս ունեմ, որ այն հանձնառությունները, որ երկկողմանի է և վերցրել են իրենց վրա կողմերը՝ Եվրոպական Միությունը և Հայաստանը, կյանքի կկոչվեն», - հավելեց արտաքին գերատեսչության ներկայացուցիչը։

Այս պահի դրությամբ ՀՀ-ԵՄ համաձայնագիրը վավերացրել են երեք պետություններ, և Պապիկյանի խոսքով, իրենց բոլոր հանդիպումներում հայկական կողմը հորդորում է ԵՄ անդամ երկրներին որքան հնարավոր է արագ վավերացնել համաձայնագիրը, որպեսզի այն ուժի մեջ մտնի։

Այս համաձայնագրի շրջանակներում Եվրոպական Միությունը 2018-2022 թվականների ընթացքում Հայաստանին տրամադրելու է շուրջ 176 մլն եվրո դրամաշնորհ։ Այդ գումարը, ըստ փոխնախարարի, ծախսվելու է Հայաստանի տարբեր ոլորտներում իրականացվելիք բարեփոխումների համար։ Մասնավորապես՝ 2018 թվականին ԵՄ-ն Հայաստանին կհատկացնի 36 մլն եվրո դրամաշնորհ։

«Հնարավորություն կա ավելին ավելիի դիմաց սկզբունքի կիրարկման դեպքում այդ գումարն ավելացնել», - ասաց նախարարը և հավելեց.

«Ես հասկանում եմ՝ բոլորին հետաքրքրում է, թե 176 մլն եվրոյի օգտագործումը չորս տարվա ընթացքում ինչ դրական փոփոխություններ կտա, ինձ թվում է՝ պետք է սպասել»։