Մանրամասներ ՀՀԿ գրասենյակի սկանդալային վիճաբանությունից. կողմերից մեկն էլ Գ. Կոստանյանն էր

Այս պահին ՀՀԿ կենտրոնական գրասենյակում շարունակվում է ՀՀԿ ԳՄ նիստը՝ արդեն 2 ժամ: Քիչ առաջ գրասենյակից աղմուկ լսվեց, 2 ՀՀԿ-ական միմյանց քաշքելով՝ դուրս եկան պատշգամբ, սակայն նրանց անմիջապես գործընկերները ներս տարան: Այդ ընթացքում հաջողվեց տեսնել միայն, որ նրանցից մեկը Գագիկ Բեգլարյանն է: Վահրամ Բաղդասարյանը կարճ ժամանակ անց նրանց պատշգամբից ներս հրավիրեց:

Պատշգամբում նկատվեց նաեւ Երեւանի քաղաքապետ Տարոն Մարգարյանը, սակայն պարզ չէ՝ նա վիճաբանողների թվու՞մ էր, թե՞ ոչ:

Այնուհետեւ գրասենյակից տեւական ժամանակ բարձր ձայներ էին լսվում, այս պահին, ըստ էության, ամեն ինչ հանդարտ է:

Քիչ առաջ էլ Տարոն Մարգարյանն ու Էդուարդ Շարմազանովը զրուցում էին նույն պատշգամբում:

«Armtimes»-ին մանրամասներ հայտնի դարձավ ՀՀԿ կենտրոնական գրասենյակում տեղի ունեցած սկանդալային վիճաբանության մասին:

«Հայկական ժամանակ»-ի աղբյուրը փոխանցում է, որ վիճաբանող կողմերը եղել են Գեւորգ Կոստանյանն ու Գագիկ Բեգլարյանը:

Նրանց վիճաբանության պատճառն անհայտ է, վեճը փորձել են կանխել Տարոն Մարգարյանն ու ՀՀԿ խմբակցության ղեկավար Վահրամ Բաղդասարյանը: