«Նա մեր ցարը չէ». Նավալնին Ռուսաստանում բողոքի ակցիաներ է կազմակերպել (LIVE)

Այսօր ողջ Ռուսաստանի տարածքում ընդդիմադիր գործիչ Ալեքսեյ Նավալնիի համախոհները ցույցեր են կազմակերպել:

Բողոքի ակցիան կրում է «Նա մեր ցարը չէ» անվանումը: Ցույցերը տեղի են ունենում Ռուսաստանի նախագահ Վլադիմիր Պուտինի երդմնակալության նախաշեմին:

Շատ քաղաքներում, այդ թվում՝ Մոսկվայում և Սանկտ Պետերբուրգում, իշխանությունները չեն արտոնել ցույցերի անցկացումը: Մի քանի քաղաքներում ակցիայի անցկացման նախօրեին իրավապահ մարմիններն արդեն ձերբակալել են ակտիվիստներին, ովքեր կոչ էին անում մասնակցել այսօրվա ցույցերին:

Ավելի վաղ Ալեքսեյ Նավալնին յութուբյան ալիքում իր հաղորդման ընթացքում ասել էր, որ Հայաստանում տեղի ունեցած հեղափոխական իրադարձությունները միասնական ազգի ցնցող օրինակ են, որն ապացուցեց՝ ազատ մարդիկ կարող են հասնել փոփոխությունների և ազատ մարդիկ մեծամասնություն են։

«Թվում էր, որ նման բան անհնար է, սակայն նրանք հաղթում են․․․ հուսով ենք, նրանց մոտ ամեն ինչ կստացվի ու մեզ մոտ զարգացող, հարուստ հարևան կհայտնվի, քանի որ երբ լավ է Հայաստանի համար, լավ է Ռուսաստանի համար», - շեշտել է նա։

Մեկնաբանելով մայիսի 1-ին վարչապետի թեկնածու Նիկոլ Փաշինյանի ընտրության տապալումից հետո ստեղծված իրավիճակը՝ նա նշել է, որ իրավիճակը կտրուկ փոխել են հասարակ մարդիկ, ովքեր դուրս եկան փողոց մայիսի 2-ին ու շրջափակեցին ամեն ինչ։

«Սա օրինակ է, երբ ապստամբած մարդիկ իշխանության բերեցին ազնիվ մարդու՝ Փաշինյանն այդպիսի տպավորություն է թողնում», - նշել է նա։

Zham.am